ՀՀԿ խմբակցության անդամ Լեռնիկ Ալեքսանյանից գնահատականներ խնդրեցինք «նորացված» ԲՀԿ-ի առնչությամբ։
– ԲՀԿ-ն այլընտրանքից անմիջապես ընդդիմություն դարձավ։ Գագիկ Ծառուկյա՞նն էր խանգարում այդ «գործին»։
– Դրանք պայմանական բառեր են։ Վերջին շրջանում Գագիկ Ծառուկյանի հայտարարություններն ամենաընդդիմադիրն էին, անկախ նրանից, թե իրենք իրենց ինչպես էին կոչում։ ԲՀԿ-ի վերջնական «կարգավիճակը» պարզ կդառնա առաջիկա վերադասավորումներից հետո։ Այն է՝ ո՛վ կլքի կուսակցության շարքերը, ո՛վ կմնա։ Զարգացումներն այնպիսի ընթացք կարող են ստանալ, որ ԲՀԿ-ում կարող են մնալ գաղափարական մարդիկ, և ավելի լավ կուսակցություն դառնա։ Կամ շատերը կմնան կուսակցությունում, և այն կմնա այլընտրանք։ Սրանք հնարավոր տարբերակներ են։ Քաղաքական դաշտը մենակ իրենցով չէ, մյուս ընդդիմադիր ուժերը ևս իրենց դերակատարումն ունեն։ Ընդդիմադիր դաշտի վերածնումներից էլ պարզ կդառնա ԲՀԿ-ի ճակատագիրը։
– ԲՀԿ-ն կպահպանի՞ նախկին «հզորությունը», քանի որ նրա «առանցքի» շուրջ էին հավաքվել մյուս ընդդիմադիրները։
Կարդացեք նաև
– Երբեք չի կարող պահպանել նախկին «հզորությունը», ինչը նախ և առաջ պայմանավորված էր ֆինանսական ռեսուրսով։ Կային անձինք, ովքեր և ֆինանսական, և մարդկային ռեսուրս ունեին, սակայն կամաց-կամաց դուրս են գալիս կուսակցությունից։ ԲՀԿ-ն առաջվա հզորությունը չի ունենա, բայց չի բացառվում, որ գաղափարապես ավելի կուռ դառնա, կայուն դիրքորոշում ունենա։ Մնան այն գաղափարականները, որոնք ինտելեկտ ունեն, իսկ ԲՀԿ-ում այդպիսի ներուժ կա։ Այսինքն՝ ԲՀԿ-ն ունի որակական ընդդիմություն ձևավորելու բոլոր հնարավորությունները։
Ռուզան ԽԱՉԱՏՐՅԱՆ
Հարցազրույցն ամբողջությամբ կարող եք կարդալ «Իրատես de facto» թերթի այսօրվա համարում
