«Սպարապետը այս սահմանային լարվածության պայմաններում սահմաններին կլիներ: Սպարապետը վերջում որոշեց ամբողջ հասակով մտնել քաղաքականություն՝ տնտեսական խնդիրները լուծելու, բանակն ապահովելու, նաեւ վերջին իր մեկ-երկու այցելություններն ամբողջությամբ ուղղված էին հիմնահարցի լուծմանը, խաղաղության հաստատմանը»,- ասաց Սպարապետ Վազգեն Սարգսյանի եղբայրը՝ «Հանրապետություն» կուսակցության նախագահ Արամ Սարգսյանը, որը եկել էր Եռաբլուր՝ Սպարապետի ծննդյան 56-ամյակը շնորհավորելու:
Նրա խոսքերով՝ «Ոչ խաղաղություն, ոչ պատերազմ իրավիճակ է: Այդ ոչ պատերազմ, ոչ խաղաղություն վիճակում զոհեր են լինում, ինչը շատ տխուր է, շատ ցավալի է, բայց դա փաստ է: Դրա համար մեկ խնդիրը քաղաքական գործիչներինն է: Բանակն իրենից ինչ հասնում է, անում է: Փառք ու պատիվ մեր բանակին, սահմանին կանգնած մեր տղաներին՝ շարքային զինվորից մինչեւ պաշտպանության նախարար: Երեւի միակ կայացած ու իր ֆունկցիաները կատարող կառույցն է»:
Հարցին՝ ի՞նչ կփոխվեր, եթե լիներ Վազգեն Սարգսյանը, նա պատասխանեց. «Եթե Վազգեն Սարգսյանը լիներ, ես այստեղ քաղաքական հարցերի չէի պատասխանի եւ հարցազրույց չէի տա, ուղղակի ստվերում կգայի, կգնայի»:
Գեներալ Մանվել Գրիգորյանն այսօր հայտարարել էր, որ Հոկտեմբերի 27-ը բացահայտված է: Արամ Սարգսյանն ի պատասխան այս հայտարարության՝ ասաց. «Ես Վազգենի ծննդյան օրը չեմ ուզում խոսել Վազգենի մահվան օրվա թեմայի շուրջ»:
Կարդացեք նաև
Հռիփսիմե ՋԵԲԵՋՅԱՆ
