Կոմիտասի թանգարան-ինստիտուտը (լուսանկարում) առաջիկայում կհամալրվի հայ ժամանակակից նկարիչների աշխատանքով:Ինչպես Aravot.am-ի հետ զրույցում նշեց Հայաստանի ազգային պատկերասրահի նախկին տնօրեն Փարավոն Միրզոյանը, մարտի 6-ին Հայաստանի ազգային պատկերասրահում կբացվի կոմիտասյան թեմաներով ցուցահանդես, որից հետո բոլոր գործերը կնվիրվեն Կոմիտասի թանգարան-ինստիտուտին: «Դա մեր վերաբերմունքն է այդ թանգարանին, որ ունենա ֆոնդերը, որպեսզի կարողանա ցուցադրել, ակցիայի նման մի բան է, որի նախաձեռնողը Աշխարհի հայ նկարիչների միության նախագահ Ղազար Միրզոյանն է»,- ասաց Փարավոն Միրզոյանը:
Նա հակադարձեց մի խումբ նկարիչների այն դժգոհությանը, թե ցուցահանդեսում ընդգրկված են «նեղ» շրջանակի ու իրենց ծանոթ արվեստագետների աշխատանքներ: Պատկերասրահի տնօրենը հայտնեց, որ ցուցահանդեսի մասին հայտարարություն արվել է, այն տեղադրված է եղել նաեւ պատկերասրահի կայքում, ով իմացել-եկել է, իսկ աշխատանքներն ընտրել է մասնագիտական հանձնաժողովը. «Հետագայում ով ցանկանում է, թող համապատասխան ստեղծագործություններ տանի ու Կոմիտասի անվան թանգարանի ղեկավարության հետ պայմանավորվի: Բայց այնպես չէ, որ ով ինչ ուզի, կարող է տանել»:
Աշխարհի հայ նկարիչների միության նախագահ Ղազար Միրզոյանը մեզ հետ զրույցում հայտնեց, որ Կոմիտասյան թեմայով ցուցահանդեսում ներառված է քանդակ, գեղանկարչություն, գրաֆիկա, դեկորատիվ կիրառական արվեստ: «Իմաստն այն է, որ նկարիչը չունենալով պետական պատվեր՝ նկարել է հայ երեւալու թեմաներով աշխատանքներ եւ նվիրելու է նույն մարդու անվան թանգարանին: Արվեստագետները ներկայացրել են իրենց գործերը, հանձնաժողովն ընտրել է այնպիսի աշխատանքներ, որոնք հարիր են Կոմիտասի անվան թանգարան-ինստիտուտի ֆոնդերը հարստացնելու համար: Կային շատ բարձր որակի աշխատանքներ, բայց դրանք իրենց ոճաբանական իմաստով այնտեղ չէին տեղավորվում»,- հավելեց Ղազար Միրզոյանը:
Ինչ վերաբերում է որոշ նկարիչների կողմից ցուցահանդեսը «թաքուն» որակելուն, այս մասին էլ Աշխարհի հայ նկարիչների միության նախագահը ասաց. «Մենք ոչինչ թաքուն չենք անում, կա նկարիչների մի մասսա, որ անընդհատ փորձում է մեր արածի վրա ստվեր գցել, եւ եթե մասնագիտական որակի վրա չի կարողանում ստվեր գցել, ասում է՝ իբր գաղտնի է, թաքուն է: Շատ նկարիչներ իմացել են այս ցուցահանդեսի մասին: Դեռեւս անցյալ տարի սուրբ Սարգսի ցուցահանդեսի ժամանակ էլ եմ ասել երիտասարդներին, մի քանի հեռուստատեսային հարցազրույցների ու ելույթների ժամանակ էլ եմ տեղեկացրել: Վաղն էլ հայտարարելու եմ, որ Զորավար Անդրանիկի ծննդյան 150-ամյակի առթիվ ենք ցուցահանդես կազմակերպելու, ով ուզում է, թող կապվի ինձ հետ: Այնպես որ, մենք վատ բան չենք անում, որ թաքուն անենք, ո՛չ ուրիշին մեջքից դանակով խփում ենք, ոչ էլ բամբասում, որ թաքուն անենք»::
Կարդացեք նաև
Գոհար ՀԱԿՈԲՅԱՆ
