Այսօր վաղ առավոտից Արարատի մարզի Արարատ գյուղում գտնվող Սպարապետ Վազգեն Սարգսյանի տունը մարդաշատ էր:
Գրետա մայրիկն ընդունում էր հյուրերին, շնորհավորում Սպարապետի ծննդյան 56-ամյակը:
Վազգեն Սարգսյանի ծնունդը շնորհավորելու համար «նրա օջախ» էին գնացել ԵԿՄ անդամները՝ Մանվել Գրիգորյանը, Սեյրան Սարոյանը, Սուրիկ Խաչատրյանը:
Նրանք գլուխ խոնարհեցին Գրետա մայրիկի առաջ: ԵԿՄ-ի անունից Մանվել Գրիգորյանը Գրետա մայրիկին հանձնեց կամավորականի վկայական եւ խմեց Վազգեն Սարգսյանի կենացը:
Կարդացեք նաև
Նրանք այցելեցին նաեւ Վազգեն Սարգսյանի տուն-թանգարան:
Գեներալ Մանվել Գրիգորյանը Արարատում ասաց. «Ստեղ էլ արդեն Սպարապետի սերմերն աճում են, ծլել են: Շնորհավո՛ր ծնունդդ, Սպարապե՛տ»:
Գեներալ Սեյրան Սարոյանն էլ մեխակը Սպարապետի կիսանդրու մոտ դնելիս մի պահ նայեց երկինք, ծաղիկը պարզեց վերեւ՝ հարգանքի տուրք մատուցելով:
Մանվել Գրիգորյանը, մտավ տուն-թանգարան, ցուցասրահում շրջեց, հանդիպելով մի խումբ երեխաների՝ հարցրեց՝ դուք պատանի երկրապա՞հ եք, թե՞ չէ: Երեխաներն ասացին՝ ոչ:
«Վա՜յ, վա՜յ, լավ չի»,- նեղսրտեց գեներալը:
Հետո ԵԿՄ-ականներն այցելեցին Եռաբլուր՝ Սպարապետի շիրիմին: Լրագրողների հետ զրույցում Մանվել Գրիգորյանը հայտարարեց, որ Հոկտեմբերի 27-ը բացահայտված է. «Ո՞վ ա ասում բացահայտված չի, նստած են, հատ-հատ անուններն ասե՞մ»: Հարցին՝ սա՞ էր Սպարապետի երազած Հայաստանը, նա սա՞ էր ուզում՝ գեներալ Մանվելը պատասխանեց. «Ոչ մի բան էլ մի հատից չի լինում, ոչ մի երկիր մի հատից չի կառուցվում: Վազգենի ուզած երկիրը 100 տոկոս կլինի, ես ձեզ կապացուցեմ»:
Հռիփսիմե ՋԵԲԵՋՅԱՆ
