Երեկ ՀՀԿ-ական գործարար պատգամավոր Սամվել Ալեքսանյանը խորհրդարանում բացված ցուցահանդես-վաճառքից նկար ձեռք բերեց եւ անակնկալ կերպով այն նվիրեց ՀԱԿ պատգամավոր Լյուդմիլա Սարգսյանին՝ մարտի 8-ի առիթով: Նկարի հեղինակն Արշակ Սարգսյանն է: Լյուդմիլա Սարգսյանն ընդունեց նվերը՝ գործընկերոջն անհարմար վիճակի մեջ չդնելու համար: Նկարը ՀԱԿ պատգամավորի աշխատասենյակը կզարդարի մինչեւ նրա պատգամավորական լիազորությունների ավարտը: Հետո Լյուդմիլա Սարգսյանը մտադիր է նկարը վերանվիրել խորհրդարանին:
Այս ամենը, սակայն, նախապատմություն ունի: Նվիրատվության «քավորը» ՀՀԿ-ական պատգամավոր Սամվել Ֆարմանյանն է, ով հետո արդեն հպարտանում էր. «Տիկին Սարգսյան, ես իմ խոսքի տերն եմ»: Բանն այն է, որ անցած քառօրյայում ՀՀԿ-ական պատգամավոր Սամվել Ֆարմանյանը խորհրդարանի միջանցքում փորձեց խոսակցության մեջ ներքաշել ՀԱԿ պատգամավորին՝ ըստ էության, հեգնական ակնարկներ անելով Լյուդմիլա Սարգսյանի քաղաքական գործունեության վերաբերյալ: Վերջինս, հիշեցնենք, մասնակցում էր ԲՀԿ նախագահ Գագիկ Ծառուկյանի հրավիրած հայտնի համաժողովին, ավելին՝ նստած էր նրա կողքին: Իսկ խորհրդարանական այդ քառօրյայից առաջ արդեն տրամաբանական ավարտին էին հասել Սերժ Սարգսյան-Գագիկ Ծառուկյան «հրաձգությունները»:
Սամվել Ֆարմանյանը հետաքրքրվել էր՝ չի՞ ցանկանում տիկին Սարգսյանը նկարները նայել ու դրանցից մեկը գնել: Լյուդմիլա Սարգսյանն ասել էր, որ նայել է, բայց գնել չի կարող: «Ի՞նչ է պատահել, մենք կառնենք Ձեզ նվեր: Գագիկ Ծառուկյանին կզանգենք՝ նվեր կառնի»,- հեգնական հումոր էր արել Սամվել Ֆարմանյանը: Ի պատասխան՝ Լյուդմիլա Սարգսյանն ասել էր. «Կարող ես Սաշիկին զանգել, Սերժ Սարգսյանին զանգել, ինձ համար մեկ է՝ ով ուզում է, թող առնի»: Հետո, արդեն հեռանալով՝ տիկին Սարգսյանը նետել էր. «Նման խոստումներ մի տուր, քանի որ դրանց տակից դուրս եկողը չես: Ես էլ միշտ հիշեցնելու եմ, թե որքան էժան են ձեր խոսքերը»:
Այս երկխոսությանը ներկա «Առավոտի» թղթակիցը խոստացավ երկու դեպքում էլ արձանագրել իրողությունը՝ էժա՞ն կվերաբերվի Սամվել Ֆարմանյանն իր խոսքին, թե՞ կարժեւորի այն: Իսկ Սամվել Ֆարմանյանը, ինչպես վերը նշեցինք, խոստացված նվերը երեկ ձեռք բերեց Սամվել Ալեքսանյանի միջոցներով:
Կարդացեք նաև
«Առավոտ» օրաթերթ
04.03.2015
մարդը դրե կայֆավատ ա ըլնում վրեքը, սրանք իրանց լավ են զգում, վայ, աշխարհ, աշխարհ: