Բրյուսել, 04 մարտի 2015թ
Եվրոպական միության արտաքին հարաբերությունների և անվտանգության քաղաքականության հարցերով բարձր ներկայացուցիչ/Եվրոպական հանձնաժողովի փոխնախագահ Ֆեդերիկա Մոգերինին և Եվրոպական հանձնաժողովի Եվրոպական հարևանության քաղաքականության և ընդլայնման բանակցությունների հարցերով հանձնակատար Յոհաննես Հաանն այսօր սկսում են Եվրոպական հարևանության նոր քաղաքականության շուրջ քննարկումները:
Եվրոպական հարևանության քաղաքականության (ԵՀՔ) վերջին փոփոխությունները կատարվել են 2011 թվականին: Հաշվի առնելով հաջորդող նշանակալից զարգացումները ՝ այսօր հատկապես կարևորվում է ԵՀՔ այն հիմնարար սկզբունքների վերանայումը, որի վրա հիմնված է քաղաքականությունը, ինչպես նաև նրա սահմանների վերանայումը և թե ինչպես պետք է համապատասխան գործիքները կիրառվեն: «ԵՄ-ն հետաքրքրված է կառուցել ամուր գործընկերություն իր հարևանների հետ: Տարածաշրջանում տեղի ունեցող վերջին զարգացումները մեծացրեցին ԵՄ-ի առջև ծառացած մարտահրավերները՝ տնտեսական ճնշումներից մինչև անկանոն միգրացիա և անվտանգության սպառնալիքներ: Այս ամենին դիմակայելու համար մեզ անհրաժեշտ է ունենալ ուժեղ քաղաքականություն: Մենք նաև պետք է ավելի լավ հասկանանք մեր գործընկերների նկրտումները, արժեքներն ու հետաքրքրությունները: Այս ամենին է ուղղված քաղաքականության վերանայումը, եթե մենք ցանկանում ենք հարևանների հետ ունենալ ամուր քաղաքական հարաբերություններ»,- ասաց Բարձր ներկայացուցիչ /Հանձնաժողովի փոխնախագահ Ֆեդերիկա Մոգերինին:
«Եվրամիության շահերից է բխում իր սահմանների երկայնքով ստեղծել կայունություն, խաղաղություն և բարգավաճություն: Այդ իմաստով քաղաքականության վերանայումը թույլ կտա ավելի արդյունավետ գործել՝ իրականացնելու վերոնշյալ նպատակները: Ցանկանում ենք տեսնել ավելի հավասար և խոստումնալից գործընկերություն»,- ասաց Հարևանության հարցերով հանձնակատար Հաանը:
Կարդացեք նաև
Մինչ ս.թ. հուլիսի վերջը նախատեսված քննարկումների նպատակն է առավել լայն խորհրդակցություններ ծավալել հարևան գործընկեր պետությունների և ԵՄ շահագրգիռ կողմերի միջև: Քննարկումներից հետո՝ աշնանը կներկայացվի Հաղորդագրություն ԵՀՔ ապագայի վերաբերյալ առաջարկների մասին:
Քննարկումների չորս հիմնական առաջնահերթությունները կլինեն. տարբերակված մոտեցում, կենտրոնացում, ճկունություն, պատկանելիություն և տեսանելիություն: Նախանշվել են երկու կողմերի համար հավասար հետաքրքրություն ներկայացնող հինգ գերակա ուղղությունները. առևտուր և տնտեսական զարգացում, միացվածություն, անվտանգություն, կառավարում, միգրացիա և շարժունակություն:
Ընդհանուր տեղեկությունների քննարկումների մասին
Եվրահանձնաժողովի նախագահ Յունկերի խոսքով՝ ԵՀՔ-ն կվերանայվի Եվրոպական հանձնաժողովի նոր կազմի մանդատի առաջին տարվա ընթացքում: Քննարկումներին գրավոր տեսք հաղորդելու նպատակով, ս.թ., մարտի 4-ին ԵՄ հանձնակատարի և Բարձր ներկայացուցչի կողմից ընդունվեց համատեղ փաստաթուղթ, որում նշվում են նախնական արդյունքները, արտաքին քաղաքականության հարցերում անցյալ տարիներից քաղված դասերը , ինչպես նաև հարևան պետությունների և շահագրգիռ կողմերի հետ քննարկման հիմնական կետերը:
Ընդհանուր տեղեկություններ Եվրոպական հարևանության քաղաքականության վերաբերյալ
Եվրոպական միության մասին Հռչակագրի 8-րդ Հոդվածի 1 կետով սահմանվում է, որ բարգավաճ և լավ հարևանության տարածաշրջան ստեղծելու նպատակով Միությունը կձևավորի հատուկ հարաբերություններ հարևան պետությունների հետ՝ հիմված միության հիմնարար արժեքների և համագործակցությանն ուղղված սերտ և խաղաղ հարաբերությունների վրա:
Եվրոպական հարեւանության քաղաքականությունը մշակվել է 2003 թվականին՝ ԵՄ-ն և իր հարևան պետությունների միջև հարաբերություններն ավելի սերտացնելու նպատակով: Այն սահմանում Է Եվրամիության հարաբերությունները հարավում՝ Ալժիրի, Եգիպտոսի, Իսրայելի, Հորդանանի, Լիբանանի, Լիբիայի, Մարոկկոյի, Պաղեստինի, Սիրիայի, Թունիսի, և արևելքում՝ Հայաստանի, Ադրբեջանի, Բելառուսի, Վրաստանի, Մոլդովայի, Ուկրաինայի հետ:
2011 թվականին, արաբական աշխարհում զարգացումների հետևանքով վերանայված ԵՀՔ նպատակն է աջակցել ժողովրդավարության, օրենքի գերակայության, և մարդու իրավունքների ուղղությամբ բարեփոխումներ իրականացնող գործընկեր պետություններին` նպաստելով այդ պետությունների ներառական տնտեսական զարգացմանը, աշխատատեղերի ստեղծմանը, առևտրի զարգացմանն ու ընդլայնել համագործակցությունն այլ ոլորտներում:
Եվրոպական հարևանության գործիքի (ԵՀԳ) միջոցով 15.4 միլիարդ եվրո ընդհանուր բյուջեի ֆինանսական աջակցություն կտրամադրվի ԵՀՔ 16 գործընկեր պետություններին 2014-2020թթ ժամանակահատվածում: Հաշվի առնելով եկրկների փորձը կապահովվի ֆինանսական օժանդակության մոդելավորման ճկունություն առանձին պետությունների կողմից ժողովրդավարության և մարդու իրավունքների ուղղությամբ կատարված առաջընթացի հիման վրա:
Համատեղ քննարկումների վերաբերյալ փաստաթուղթ՝ «Եվրոպական հարևանության նոր քաղաքականությանն ընդառաջ»
Հայաստանում Եվրոպական միության պատվիրակություն
