ԱԺ-ում քննարկվում է Անձնական տվյալների պաշտպանության մասին օրենքում փոփոխություններ կատարելու մասին նախագիծը: Քննարկման ժամանակ ՀԱԿ խմբակցության ղեկավար Լեւոն Զուրաբյանը հայտարարեց, որ իրենք դեմ են քվեարկելու այդ նախագծին:
Նա ասաց, որ անձնական կամ ընտանեկան կյանքին վերաբերող տեղեկությունների պաշտպանությունը ժողովրդավարության կարեւորագույն հենասյուներից է. «Այդ պաշտպանությամբ ժողովրդավարական պետությունը պաշտպանում է իր քաղաքացու, ձեռնարկությունների տվյալները ապօրինի միջամտությունից, ապօրինի թափանցումից՝ չարամիտ մանիպուլյացիաների նպատակով: Պատահական չէ, որ այս հարցը կարեւորվում է մարդու իրավունքների համաշխարհային հռչակագրում, որտեղ նշված է, որ յուրաքանչյուր ոք իրավունք ունի պաշտպանված լինել անձնական տվյալներին ոտնձգություններից»:
Ըստ Լեւոն Զուրաբյանի, Հայաստանում մեծագույն խնդիրը շարունակում է մնալ հատուկ ծառայությունների կողմից իրականացված՝ ընդդիմության անդամների տոտալ գաղտնալսումը, լրտեսումը. «Մեր հետախուզությունը եւ հատուկ ծառայությունները իրենց ողջ պոտենցիալի մեծագույն մասն ուղղում են ընդդիմադիրների ուղղությամբ, ոչ թե հակառակորդի: Եթե այդ ամբողջ գումարները ծախսվեին հակառակորդի դեմ, մենք հիմա լրիվ այլ պատկեր կունենայինք սահմանում»:
Ապօրինի գաղտնալսման մասին խոսելիս Լեւոն Զուրաբյանը հիշեցրեց հայտնի դեպքը. «Բոլորդ տեղյակ եք իմ եւ Վարդան Օսկանյանի խոսակցության ձայնագրության մասին, որի հետաքննության արդյունքներին մինչեւ հիմա սպասում ենք: Խոսակցությունը, որը տեղադրվել էր ինտերնետում՝ այնպես էր մոնտաժված, որ լիովին մատնում էր իշխանությունների քարոզչական նպատակները: Ես քննիչին ասացի, որ պետք չէր շատ չարչարվել, որովհետեւ բոլոր հետքերը տանում են դեպի ՀՀ հատուկ ծառայությունները: Քննիչի ձեռքի տակ կար բոլոր հետքերը, բոլոր տեխնոլոգիական հետքերը թողել էին այդ հանցագործները: Քննիչն ասաց, որ անպայման կգտնի այդ հանցագործներին: Էլ այդ քննիչից ես ոչ մի բան չեմ լսել, որովհետեւ ակնհայտ էր, թե ինչ է կատարվում»:
Կարդացեք նաև
Անդրադառնալով նախագծին՝ Լեւոն Զուրաբյանն ասաց, որ «Անձնական տվյալների պաշտպանության մասին» օրենքի այս նախագիծը օրենք է՝ անձնական տվյալների՝ երրորդ անձանց եւ այլ պետությունների փոխանցման մասին . «Մեր իշխանությունը շատ խտրական է վարվելու անձնական տվյալների պաշտպանության հարցում, ծածկելու է իշխանավորներին, թույլ է տալու օգտագործել տվյալները ընդդիմախոսների դեմ: Սա մեր պետության բնույթն ու պատկերն է, մենք մերժում են այն պնդումները, թե սա եվրոպական մոդել է: Եվրոպական մոդելն աշխատում է ժողովրդավարական երկրներում, որտեղ գոյություն ունի հանրության վերահսկողություն պետության, կառավարության, հատուկ ծառայությունների նկատմամբ, որը Հայաստանում իսպառ բացակայում է:Մենք մերժում ենք մեծ եղբոր ամենատես աչքը եւ դեմ ենք քվեարկելու այս խայտառակ օրենքին»:
Հռիփսիմե ՋԵԲԵՋՅԱՆ
