Հայաստանում ռուսական ռազմաբազայի հրաձգային ստորաբաժանումների զորավարժությունները սկսվել են երեկ, բարձր լեռնային գոտում տեղակայված «Ալագյազ» ուսուցողական համալիրում: Այս մասին, ըստ «Interfax»-ի հայտնում են Հարավային ռազմական օկրուգի շտաբից:
Ուսումնական վարժանքներում օգտագործվում են «Գվոզդիկա» ինքնագնացներ, «Գրադ» տեսակի հրթիռային համալիրներ, «Պոդնոս» ականանետեր եւ «Կոնկուրս» համալիրի հակատանկային հրթիռներ: «Օգտագործվում են նաեւ «Նավոդչիկ-2» ժամանակակից հետախուզության անօդաչու թռչող սարքեր»,- ասվում է օկրուգի տարածած հաղորդագրությունում:
Հավաքներին մասնակցում են մոտավորապես 400 զինծառայողներ եւ կշարունակվեն ամբողջ մարտ ամսվա ընթացքում. «Մեկամսյա ծրագրի ընթացքում հրաձիգները կանցնեն տակտիկական, հատուկ եւ տեխնիկական վերապատրաստում, ինչպես նաեւ՝ ժամանակակից զինվորական տեխնիկա վարելու, կրակելու եւ կրակային զենքերը կառավարելու դասընթացներ»:
Ռուսական ռազմաբազայի հրաձիգների զորավարժությունները կավարտվեն մարտական կրակով համալրված տակտիկական զորավարժություններով, որի ընթացքում լեռնային տարածքներում կկատարվեն կենդանի ուժի կրակային խոցման առաջադրանքներ: Ուսումնական օրը տեւելու է 10 ժամ, որի կեսը կանցկացվի գիշերը: Հավաքները անցկացվում են մոտավորապես 2.000 մետր բարձրության վրա:
Կարդացեք նաև
Պատրաստեց Աշոտ ԻՍՐԱԵԼՅԱՆԸ
