«Հայ ընտանիքի սպանության մեջ մեղադրվող Պերմյակովը ենթակա չէ հայ իրավապահ մարմիններին փոխանցվելու, քանի որ նա ՌԴ քաղաքացի է»,- ԱԺ պատգամավոր Զարուհի Փոստանջյանի նամակին ՌԴ գլխավոր դատախազության այս պատասխանում «Իրազեկ քաղաքացիների միավորում» հկ համակարգող Դանիել Իոաննիսյանը երկու հաղորդագրություն է տեսնում:
«Առաջին, որ իրենք համարում են, թե Հայաստանում գտնվող ռուսական զորամասերը Ռուսաստանի տարածք են, բայց այդպես չէ: Այդ տարածքը Հայաստանի տարածք է, այդ տարածքում գործում է Հայաստանի սահմանադրությունը, այդ տարածքներում իրավական դաշտը սահմանվում է հայ-ռուսական պայմանագրերով: Ռուսաստանի սահմանադրությունը ոչ մի կերպ չի կարող տարածվել Հայաստանի տարածքում գտնվող որեւէ տարածքի, զորամասի վրա»,- Aravot.am-ին ասաց Դանիել Իոաննիսյանը:
Նրա ընկալմամբ, երկրորդ հաղորդագրությունը արհամարհանքն էր Հայաստանի տարածքային ամբողջականությանը. «Ռուսական կողմը չի հարգում հայ-ռուսական պայմանագրերը եւ իրավունք է իրեն վերապահում այդ միջպետական պայմանագրերը խախտել: Առնվազն սահմանապահների 92 թվականի պայմանագիրը եւ 97 թվականի իրավական փոխօգնության պայմանագիրը»:
Կարդացեք նաև
Ըստ նրա, երբ ռուսական կողմը հակառակ միջպետական պայմանագրերի, հայ-ռուսական հարաբերությունների ապագայի, հրաժարվում են Պերմյակովին արտահանձնել, դա խոսում է այն մասին, որ «տարբեր կեղտեր կան թաքնված այս գործում, որոնք իրենք չեն ուզում ջրի երես հանել». «Միգուցե Պերմյակովը միայնակ չի եղել, միգուցե նա ընդհանրապես հանցագործություն կատարողը չի եղել, գլխին սարքում են, չեմ խորանում վարկածների մեջ, բայց այս ամենը իրավունք է մեզ տալիս ենթադրելու, որ այստեղ մի բան այն չէ»:
Ինչ վերաբերում է Ռուսաստանի դատախազության հիմնավորմանը, թե Պերմյակովը ՌԴ քաղաքացի է, ինչի համար էլ ենթակա չէ արտահանձնման, Դանիել Իոաննիսյանը կրկնեց, որ նա հանցագործություն է կատարել Հայաստանի տարածքում, ինչի դեպքում այլեւս կարեւոր չէ, թե որ երկրի քաղաքացի ես:
Արփինե ՍԻՄՈՆՅԱՆ
