«Ասում եք՝ Հայաստանում ընդդիմությունը փոշիացավ: Բայց այդ ընդդիմությունը գաղափարական հիմքեր չուներ, իսկ եթե քաղաքական պայքարը չունի գաղափարական հիմքեր, այդ պայքարը քաղաքական համարել չի կարելի: Դա պարզապես պայքար էր իշխանության համար»,- այս կարծիքին է Պաշտպանության նախկին փոխնախարար Վահան Շիրխանյանը:
Նա չհամաձայնեց շրջանառվող այն տեսակետի հետ, թե Սերժ Սարգսյանը մեկ գիշերվա մեջ փոշիացրեց ընդդիմությանը.«Լավ, նախագահը խոսեց Ծառուկյանի մասին, Ծառուկյանը հաջորդ օրը թող աներ իր հանրահավաքը, հայտարարեր՝ էս էսպես չէ, սաղ սուտ է, ինչու չարեց, ինչ է նշանակում մի գիշերվա մեջ կոտրեց: Եթե ընդդիմադիր քաղաքական գործիչը նպատակ ուներ գնալ մինչեւ վերջ»:
Ինչ վերաբերում է Լևոն Տեր-Պետրոսյանի վերջին ելույթին, Վահան Շիրխանյանը առանձնացրեց իր տպավորությունները. «Առաջին նախագահը ասում է՝ պետություն շարժվիր իմ ուղենշած ուղով ու մի շեղվիր, եթե շեղվես աղետալի հետեւանքներ կլինեն: Եթե այս հռչակագիրը ընդունեցիր, Թուրքիան կկատաղի, աշխարհի երկրները շուռ կգան Հայաստանից, եւ մենք կմնանք աղետալի վիճակում: Իհարկե, դա չեմ ընդունում, համարում եմ՝ ցեղասպանության 100-րդ տարելիցի հիշատակմանը նվիրված հռչակագիրը մեղմ է գրված, այն ավելի խիստ պետք է լիներ: Համաձայն չեմ, որ առաջին նախագահն ասում է, թե թուրքերի հետ հարաբերությունները կարգավորել, երբ Թուրքիան խոսում է միայն նախապայմանների լեզվով կամ Ադրբեջանի հետ պետք է խնդիրները լուծել փոխզիջումներով, երբ դաշտում ունենք մի հատ մադրիդյան առաջարկ, որը ոչ թե ղարաբաղյան կոնֆլիկտի, այլ Արցախի կապիտուլյացիայի առաջարկ է»:
Մարտի մեկին 1-ին նախագահի ելույթն էլ պարոն Շիրխանյանը չի մեկնաբանում՝ բացատրելով, որ առաջին նախագահը ղեկավարում էր ընդդիմությունը ու շատ ավելի խորքից տիրապետել ու տիրապետում է քաղաքական դաշտը:
Կարդացեք նաև
Արփինե ՍԻՄՈՆՅԱՆ
