«Լևոն Տեր-Պետրոսյանի ելույթը նահանջ էր երգով»,- անդրադառնալով ՀՀ առաջին նախագահ Լևոն Տեր-Պետրոսյանի` մարտի 1-ին հնչեցրած ելույթին, այսպիսի կարծիք հայտնեց «Ազգային համաձայնություն» կուսակցության նախագահ Արամ Հարությունյանը: Ըստ նրա` դրոշը վերցնող չեղավ, այնինչ հենց ՀԱԿ-ը մեծ հնարավորություն ուներ այդ դրոշը վերցնելու:
Դառնալով Լևոն Տեր-Պետրոսյանին` ասաց. «Հիմա ինքը մարտի 1-ի հանրահավաքում կծաղրի մյուս ընդդիմադիրներին, թե` ոչ, դա արդեն երկրորդական է: Ակնհայտ է մի բան. իշխանությունը վախից, թե ամեն ինչը կորցնելու սպառնալիքից գնաց տեռորի ԲՀԿ-ի նկատմամբ` եռյակի հիմնական քաղաքական ուժերի լռելյայն համաձայնությամբ»:
Ըստ Արամ Հարությունյանի` «ոչ Լևոն Տեր-Պետրոսյանի, ոչ էլ Րաֆֆի Հովհաննիսյանի դեմքի արտահայտությունից չի երևում, թե ինչ-որ բան է տեղի ունեցել»:
Արամ Հարությունյանը մտահոգված է, թե ՀՀ-ում այսօր ցեղասպանություն է տեղի ունենում ու շարունակում. «Ո՞ւր էր մեր կաթողիկոսը էլի բիզնեսո՞վ էր զբաղված, ո՞ւր էին մեր մտավորականները: Հետո էլ խոսում են մշակութային արժեքների մասին: Սերժ Սարգսյանի ելույթում քանի՞ մշակութային արժեք կար»:
Կարդացեք նաև
Արամ Հարությունյանի համար հիմնական թեման այն է, որ «երկրի հերն անիծվում է և Սերժ Սարգսյանը չի թողել քաղաքական լուծում, քանի որ ասում են ընտրություններով չեք կարող, քանի որ կեղծում ենք, քաղաքական ձևով չեք կարող, կփակենք, լրատվամիջոցներ են մի գիշերում փակում»:
Ըստ պարոն Հարությունյանի` լուծումը կարող էր լինել այն, որ թեև Ծառուկյանին փակեցին, բայց եռյակի ուժերը շարունակում են համաժողովրդական շարժումը, ինչը չարեցին: Այս առիթով պարոն Հարությունյանն ասաց. «Հիմա որքան էլ փորձեն ֆեյսբուքում արդարացնել Լևոն Տեր-Պետրոսյանին, կամ Րաֆֆի Հովհաննիսյանին, մեկ է` էական չէ; Լևոնի վկա է, Րաֆֆիի վկա է, դա ինձ համար երկրորդական է, ես իմ հայրենիքի մասին եմ մտածում»:
Տաթև ՀԱՐՈՒԹՅՈՒՆՅԱՆ
