«Վերհիշենք Ադրբեջանի պաշտպանության նախարարի մի քանի օր առաջ արած հայտարարությունը զինվորական ստորաբաժանում բացելու կապակցությամբ, որ օր օրի մեր հողերը ետ վերադարձնելու ժամանակը անընդհատ մոտենում է: Այսինքն, ադրբեջանական կողմը չի թաքցնում, որ ինքը չի հրաժարվել իր ապակայունացնող ռազմավարությունից: Հայկական կողմն էլ չի կարողացել որեւէ կերպ ապահովել Ադրբեջանին զսպման քաղաքականություն: Հետեւաբար ակնհայտ է, որ Ադրբեջանը չի հրաժարվել իր մտադրություններից»,- «Միջազգային եւ անվտանգության հարցերի հայկական ինստիտուտի» հիմնադիր նախագահ Ստյոպա Սաֆարյանն Aravot.am-ի հետ զրույցում այսպես պատասխանեց մեր հարցին՝ ո՞րն է հատկապես վերջին երկու օրերին սահմանային լարված իրավիճակի պատճառը:
Պարոն Սաֆարյանի դիտարկմամբ՝ «Կարծում եմ, որ սա թուրք-ադրբեջանական նախաձեռնություն է՝ ապրիլի 24-ի նախաշեմին՝ Հայաստանի համար պայքարի եւ ջանքերի դեմ ճակատ ստեղծելու: Կարծում եմ, Ադրբեջանն ինքը մեծ եղբոր խնդրանք ունի՝ հայկական կողմի գործողությունները, ջանքերը, ռեսուրսները այլ ուղղությամբ ուղղորդելու: Եվ դա անում է ապրիլի 24-ի նախաշեմին»:
Հռիփսիմե ՋԵԲԵՋՅԱՆ
