Ռուսական լրատվամիջոցները այսօր Ավետիսյանների ընտանիքի սպանության մեջ մեղադրվող Վալերի Պերմյակովի գործով նորություն են հրապարակել: Ինչպես տեղեկացնում են Rosbalt-ը եւ «Զաբմեդիա»-ն
Չիտայում ` Պերմյակովի ծննդավայրում, ավելի քան 50 զինվորական և պաշտոնյա, որոնք թույլ են տվել Գյումրիում 7 հոգու սպանած Վալերի Պերմյակովին ծառայել ռուսական բանակում, պատասխանատվության կենթարկվեն:
Չիտայում արդեն քրեական գործ է հարուցվել 321-րդ հոսպիտալի բժիշկների նկատմամբ, որոնք Վալերի Պերմյակովի մոտ չեն հայտնաբերել հոգեկան շեղումներ: Ռուսական կողմը պնդում է, որ Պերմյակովն ունեցել է հոգեկան խանգարումներ:
«Իրազեկ քաղաքացիների միավորում» հ/կ համակարգող Դանիել Իոաննիսյանը ռուսական լրատվամիջոցների այս հրապարակումներում հայկական կողմին ուղղված ակնարկ է տեսնում:
Կարդացեք նաև
«Նշանակում է, որ սա գործողություն է Պերմյակովին հայկական կողմին չփոխանցելու, իբր թե ռուսական կողմն էլ է գործը քննում, Ռուսաստանում էլ են այդ գործով մեղադրյալներ հանդես գալիս, ինչի համար պետք է ռուսական կողմը գործը քննի, այսինքն` Պերմյակովին չփոխանցելու արդարացումն է: Ռուսական շատ լրատվամիջոցներ բացահայտ ու հանգիստ խղճով ստում են ու նույնիսկ, երբ այդ սուտը ջրի երես է դուրս գալիս, չեն բարեհաճում հերքել կամ ներողություն խնդրել, այդպիսի բազմաթիվ դեպքեր կան: Երկրորդ անգամն է` նման տեղեկատվություն է տարածվում, նախորդ անգամ Չիտայի զինկոմիսարի վրա էին իբր գործ հարուցել, բայց զինկոմը շարունակում է կառավարական պարտավորությունները կատարել: Այս անգամ` բժիշկների վրա, հակված չեմ վստահել ռուսական լրատվամիջոցներին, փորձում եմ տեսնել, թե ռուսական կողմը հերթական ինչ խորամանկության է փորձում դիմել»,- Aravot.am-ին ասաց Դանիել Իոաննիսյանը:
Արփինե ՍԻՄՈՆՅԱՆ
