«Րաֆֆին նաեւ հայտարարեց, որ վարչության անդամները եւ որոշ ակտիվիստներ այդ օրը լինելու են Հյուսիս-արեւելյան սահմանում`Վանաձորում, Նոյեմբերյանում, Շամշադինում, Բերդում»,- խորհրդարանական բրիֆինգների ժամանակ պատասխանելով Aravot.am-ի հարցին`մարտի 1-ին «Ժառանգությունը» կամ կուսակցության առանձին անդամներ մասնակցելո՞ւ են ՀԱԿ-ի եւ ՀԺԿ-ի հրավիրած հանրահավաքին, ասաց «Ժառանգություն» խմբակցության ղեկավար Ռուբեն Հակոբյանը: Նա նաեւ հստակեցրեց, որ կուսակցության այն անդամները կամ համակիրները, ովքեր սահմանում չեն լինելու`կմասնակցեն հանրահավաքին, եթե ցանկանան:
Ճշտող հարցին`սահմանային այցելության համար այդ օրը հատո՞ւկ էր ընտրվել`խուսափելու համար այդ հանրահավաքին մասնակցությունից, մանավանդ, որ նախորդ ուրբաթ օրը, Ազատության հրապարակում Րաֆֆի Հովհաննիսյանը հայտարարեց, թե եռյակն այլեւս գոյություն չունի: «Մենք նախապես ունեինք մեր աշխատանքային գրաֆիկը, որ այդ օրերին պետք է լինենք Հյուսիս արեւելքում»,- ասաց Ռուբեն Հակոբյանը:
Մեկ այլ հարցի`մարտի 5-ին կայանալիք ԲՀԿ-ի համագումարին «Ժառանգությանը» հրավիրե՞լ են, բանախոսն ասաց. «Առայժմ ոչ: Բայց չգիտեմ` հրավերներ կլինե՞ն, քաղաքական մյուս ուժերը կմասնակցե՞ն, թե`ոչ»: Նա հորդորեց`մեկ շաբաթ սպասել եւ կտեսնել թե ի՞նչ հեռանկար կա ԲՀԿ-«Ժառանգություն» հարաբերությունների համար: «ԲՀԿ-ի համագումարը որոշակիություն կմտցնի ոչ միայն ԲՀԿ-ի այլ ընդհանրապես ընդդիմադիր դաշտի հետագա գործունեության մեջ»,- ասաց նա:
Հայաստանյան քաղաքական դաշտում առկա ճգնաժամը, Ռուբեն Հակոբյանը վերագրում է ողջ քաղաքական սպեկտորին, ոչ թե միայն ընդդիմությանը: Նա կարծում է, որ իշխանությունը մի բան հստակ պետք է գիտակցի`իրեն ընդդիմություն են ոչ թե առանձին քաղաքական ուժեր կամ գործիչներ, այլ ժողովուրդը:
Կարդացեք նաև
Ամեն դեպքում, նա գտնում է, որ շատ հարցեր կան, որոնց շուրջ ընդդիմությունն ու իշխանություն կարող են միասնական օրակարգ կազմել եւ դուրս գալ այս իրավիճակից`դուրս բերելով նաեւ երկիրը: Ռուբեն Հակոբյանը վստահ է`իշխանության մեջ շատ լուրջ մարդիկ կան, լուրջ մտավորականներ կան, որոնք ավելի մտահոգ են, քանի որ առավել ինֆորմացված են, ուղղակի քաղաքական կոնյուկտուրան առայժմ թույլ չի տալիս, որ իրենք իրենց մտածածը բարձրաձայնեն:
Նելլի ԳՐԻԳՈՐՅԱՆ
