Ըստ Լիլիթ Գալստյանի՝ պիտի սահմանել անմոռուկը գործածելու իրավունքը, այլապես էժան վիճակներում կհայտնվենք
Հայոց ցեղասպանության 100-ամյակին ընդառաջ թողարկված կրծքանշան անմոռուկները նորմալ ընդունվեցին հասարակության կողմից: Հայաստան կատարած այցերի ժամանակ այդ անմոռուկներից մեր պաշտոնյաները նվիրում են օտարերկրյա տարբեր բարձրաստիճան պաշտոնյաների: Հայտնի անմոռուկից կրում էր նաեւ «Փերինչեքն ընդդեմ Շվեյցարիայի» գործով ՄԻԵԴ-ում Հայաստանի կառավարությունը ներկայացնող Լոնդոնի Doughty Street փաստաբանական պալատի անդամ, միջազգային հայտնի փաստաբան Ամալ Քլունին եւ այլք:
Պարզվում է, որպես կրծքանշան կիրառվող անմոռուկի այլ տարբերակներ էլ կան, օրինակ՝ շապիկներ, որոնց վրա անմոռուկն է պատկերված, վզկապներ, գլխաշորեր ու թիթեռներ: Այս փաստը դուր չի եկել մի շարք հայտնի քաղաքական, հասարակական գործիչների, ինչպես նաեւ սովորական ՀՀ քաղաքացիների, որոնք փաստը որակում են իբրեւ խեղկատակություն, ցավը՝ բիզնեսի առարկա դարձնելու միջոց: Հիմնադիր խորհրդարանի անդամ Գարեգին Չուգասզյանը ֆեյսբուքյան իր էջում տեղադրել է մի լուսանկար, որում պատկերված է այն թիթեռնիկը, որի վրա անմոռուկն է ու Ծիծեռնակաբերդի հուշահամալիրը: Նա զարմացած գրում է. «O,՜ դեռ ինչե՜ր պիտի տեսնենք 100-ամյակին ընդառաջ…»: Գարեգին Չուգասզյանի՝ ֆեյսբուքյան էջում զետեղված նկարի տակ ծավալված քննարկումներում հասարակությունն այն համարում է դիմակահանդեսի տարր, բայց ոչ սգո խորհրդանիշ: Մարդկանց զայրացնում է հատկապես այն փաստը, որ անմեղ զոհերի հիշատակի լուրջ ու զուսպ արարողությունը վերածվում է գունագեղ թատրոնի՝ ականջօղերով, վզկապներով ու գլխաշորերով: Գրառումներում զարմանքն այնքան մեծ է, որ մարդիկ հարցնում են՝ արդյոք անմոռուկով լողազգեստների ու ներքնաշորերի է՞լ են ականատես լինելու…
Կարդացեք նաև
«Առավոտի» հետ զրույցում նախկին ԱԺ պատգամավոր, ՀՅԴ ԳՄ անդամ, թարգմանիչ եւ բանասեր Լիլիթ Գալստյանը եւս անդրադարձավ անմոռուկներին: Նրա խոսքով՝ «Այս օրերին համացանցում անմոռուկի՝ Ցեղասպանության 100-ամյա տարելիցի խորհրդանիշի պատկերով զանազան առարկաներ նշմարեցի, այդ թվում՝ թիթեռնիկներ։ Միանշանակ է այս խորհրդանիշը, որը հիշողության, ցավի, կորստի, պահանջատիրության ու դատապարտումի մեր որդեգրված փիլիսոփայության տեսողական սիմվոլն է, բացառիկ նուրբ ու մտածված գործածություն, կիրառություն է պահանջում։ Այն չպիտի դառնա շահարկման, առավել եւս՝ անձնական բիզնեսի առարկա։ Կարծում եմ՝ այս տարբերանշանը գործածելու իրավունքը կամ չափանիշները պիտի սահմանել, այլապես կարող ենք խոցելի, էժան վիճակներում հայտնվել»։
ԵՎԱ ՀԱԿՈԲՅԱՆ
«Առավոտ» օրաթերթ
26.02.2015
https://www.youtube.com/watch?v=BRP7P4h8t88
Symbol of Armenian Genocide 100 Centennial and Slogan
Հայոց ցեղասպանության 100-ամյակի տարբերանշանը