Դեմքի վրայի ցանն ու կորյակները խոսում են ներքին օրգանների խնդիրների մասին, եւ մինչ այդ ցանից ու կորյակներից ազատվելու համար կոսմետոլոգին դիմելը, ճիշտ կլինի նախ դիմել նեղ մասնագետների օգնությանը: Իսկ աչքերի շուրջ առաջացած ճարպագնդերն, ըստ մասնագետների, լյարդ-երիկամի ոչ կանոնավոր աշխատանքի հետ է կապված: Եթե այս օրգանները հետազոտելուց հետո պարզել եք, որ դրանք առողջ են, եւ ճարպագնդերի առաջացումն ընդամենը մաշկային խնդրի հետեւանք է, այսինքն՝ ճարպը հավասարապես չի բաշխվել, ապա ժողովրդական բժշկությունը դրանցից ազատվելու արդյունավետ միջոցներ է առաջարկում:
1 գլուխ սոխը ջեռոցում խորովել, անցկացնել քերիչով, քերել նաեւ սոխի քերուկի կեսի չափով օճառ, սրանք խառնել իրար, քսել մաքուր մաշկին եւ լվանալ կես ժամից:
1 ճաշի գդալ թթվասերը խառնել նույն քանակի ջրիկ մեղրի հետ եւ ավելացնել կես թեյի գդալ սեղանի աղ: Ստացված խառնուրդը քսել ճարպագնդերին, թողնել 20 րոպե, հետո լվանալ գոլ ջրով:
Թարմ հալվեի (ալոե) տերեւները կտրատել եւ դնել ճարպագնդերի վրա ամբողջ գիշեր, առավոտյան լվանալ գոլ ջրով:
2 ճաշի գդալ կարմիր կավը (վաճառվում է դեղատներում) խառնել նույն քանակի թթված կաթի հետ, ավելացնել մեկ պտղունց աղ: Մի քանի րոպե թողնել դեմքին ու կիսաչոր վիճակում լվանալ:
Կարդացեք նաև
Սխտորը անցկացնել քերիչով եւ հավասար քանակությամբ ցանկացած բուսայուղի հետ խառնել: Քսել համապատասխան հատվածներին եւ թողնել 10-15 րոպե:
Աղալ թարմ սոխը, ստացված մասը՝ 1 ճաշի գդալ, ավելացնել նույնքան հեղուկ մեղր եւ 1 թեյի գդալ ալյուր: Քսել ճարպագնդերի հատվածում՝ թողնելով 20 րոպե:
Դեմքի բծերից, ճարպագնդերից, կորյակներից ազատվելու համար էլ ժողովրդական բժշկությունն առաջարկում է 2 ճաշի գդալ արեւածաղկի ձեթը եւ նույնքան օղին խառնել իրար: Այս զանգվածը պետք է օգտագործել որպես կոմպրես, որը հրաշալի միջոց է վերը նշված խնդիրների վերացման համար:
Նշենք, որ դիմակները պետք է լվանալ գոլ ջրով, ապա բարակ շերտով եթերայուղեր քսել:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
26.02.2015
