Փետրվարի 21-ին անհայտ անձինք գիշերով մտել են Շիրակի մարզի Ազատան համայնքի գյուղապետարանի շենք՝ գումար ման գալով այնտեղ: Ազատանի գյուղապետ Վարդան Իկիլիկյանը Aravot.am-ին ասաց, որ գողերը կոտրել են գյուղապետարանի գրեթե բոլոր սենյակների կողպեքները՝ թվով 7-8, տարել են իր առանձնասենյակում եղած հուշանվերները, կոնյակները: Անգամ հուշանվեր-խնայատուփ է եղել այնտեղ, ջարդել ու տարել են հավաքված գումարը՝ մոտ 5-6 հազար դրամի չափով:
Ըստ գյուղապետի` ջրատաքացուցիչ է եղել շենքում, դա եւս գողացել են, խառնել են բոլոր թղթերը: Իրենք «Կարմիր խաչի» ծրագրի շահառու անդամ են, «Կարմիր խաչը» իրենց վրաններ է նվիրել, դրանք եւս թռցրել են:
«Գիտեք, որ մի քանի օր առաջ գողություն էր կատարվել Գուսսանագյուղում, այնտեղից գողացել էին 3 միլիոն դրամի չափով գումար: Ես դրանից հետո զգուշացրի, որ գյուղապետարանում գումար չպահեն, իհարկե, շատ դժվար է, որ փող պահելու տեղ չունենք, հո ամեն օր բանկերը չենք ընկնի, բայց ի՞նչ արած: Մեծ թվով պահակներ պահելու հնարավորություն էլ չունենք: Ցավն այն է, որ գյուղապետարանները վարկով գումար են վերցնում, չկա գյուղապետ, որը 5-10 միլիոնի չափով վարկ վերցրած չլինի, բայց հիմա էս գողերն էլ գալիս, պարտքերի տակ են գցում մեզ: Ինձ ոստիկանության աշխատակիցները ասացին, որ գողությունը կատարվել է նույն ձեռագրով, ինչ Գուսաննագյուղում: Կան ոտնահետքեր, մատնահետքեր, վրանները, որոնք մեզ հատկացրել էր «Կարմիր Խաչը», միայն 9 համայնքներ ունեն, խանութներում չեն վաճառում:Մի խոսքով, երեւի թե գողերը արագ հայտնաբերվեն այս հետքերով: Ասեմ, որ մենք 5-6 համակարգիչ ունենք, ոչ մեկը չեն գողացել: Գուսաննագյուղում էլ համակարգիչը տարել էին, բայց մտածելով, որ դրանով շուտ կբռնվեն, գյուղապետարանի բակում գցել ու փախել էին»,- ասաց Ազատանի գյուղապետը:
Շիրակի մարզի դատախազ Րաֆֆի Ասլանյանը Aravot.am-ին տեղեկացրեց, որ հարուցվել են երկու տարբեր քրեական գործեր, ՀՀ Քրեական օրենսգրիք 177 հոդվածի 2-րդ մաս 3-րդ կետի հատկանիշներով: Դեռ կասկածյալներ չկան:
Կարդացեք նաև
Լուսանկարը՝ Hetq.am-ի
Նունե ԱՐԵՎՇԱՏՅԱՆ
