Aravot.am-ը անդրադարձել է Նիկոլ Աղբալյանի անվան թիվ 19 դպրոցում վերջերս գրանցված միջադեպին` աշխարհագրության ուսուցչուհի Արմինե Սեյրանյանի աշխատանքից ազատվելուն, որը կապվում էր ՀՀ բնապահպանության նախարար Արամայիս Գրիգորյանի որդու՝ Թեմուրի անվան հետ: Հիշեցնենք, որ փետրվարի 17-ին, Նիկոլ Աղբալյանի անվան 19 դպրոցի երեխաները բողոքի ցույց են արել ի պաշտպանություն աշխատանքից ազատված իրենց աշխարհագրության ուսուցչուհու, եւ նրանց կարողացել էր հանգստացնել միայն դպրոցի նախկին տնօրեն Հասմիկ Ղարիբյանը:
Դպրոցի ներկայիս տնօրեն Լիանա Աշրաֆյանը Aravot.am-ին ասել էր, թե ուսուցչուհին իր դիմումի համաձայն է ազատվել աշխատանքից, բնապահպանության նախարար Արամայիս Գրիգորյանն էլ նշել էր, որ կատարվածը իր որդու հետ կապ չունի: Իսկ ԿԳ նախարար Արմեն Աշոտյանը Azatutyun.am-ին հայտնել էր, որ Արմինե Սեյրանյանը հեռացվել է հակամանկավարժական պահվածքի պատճառով:
Այս համատեքստում տարօրինակ էր ՀՀ ոստիկանության Երեւան քաղաքի վարչության կենտրոնական բաժնից ոստիկանության փոխգնդապետ Ա. Պողոսյանի ստորագրությամբ (կատարող՝ Լ. Կարապետյան) «Առավոտին» ուղարկված հետեւյալ բովանդակությամբ գրությունը. «Հայտնվում է, որ Aravot.am կայքում 16.02.2015թ. տպագրված «Ուսուցչուհուն ազատել են նախարար որդու պատճառո՞վ» վերտառությամբ հոդվածի վերաբերյալ նախապատրաստված նյութերով պարզվել է, որ Արմինե Սեյրանյանն աշխատանքից ազատվել է իր կամքով»:
Գոհար ՀԱԿՈԲՅԱՆ
