Լուսինե Սահակյանի կարծիքով՝ դատավորը Քրեական դատավարության օրենսգրքի կոպիտ խախտում է թույլ տվել:
Արաբկիր եւ Քանաքեռ Զեյթուն վարչական շրջանների ընդհանուր իրավասության դատարանում դատավոր Արթուր Մկրտչյանի նախագահությամբ փետրվարի 25-ին շարունակվում էր վերլուծաբան Արգիշտի Կիվիրյանի գործով դատական նիստը:
Նիստի ավարտից հետո Արգիշտի Կիվիրյանի պաշտպան Լուսինե Սահակյանը Aravot.am-ի հետ զրույցում նշեց, որ պաշտպանական կողմը դատարանի՝ միջնորդությունը մերժելուց հետո հայտարարեց, որ դատավոր Արթուր Մկրտչյանը միջնորդությունը պետք է խորհրդակացական սենյակում քննարկի. «Մենք հայտարարեցինք, որ նա իրավունք չուներ դա տեղում քննարկել, նա պետք է գնար խորհրդակացական սենյակ: Ընդ որում, նրա գործընկերներից Մկոյանը այն պատճառով, որ չի գնացել խորհրդակցական սենյակ, ենթարկվել է կարգապահական պատասխանատվության»:
Նա ասաց, որ այնուհետեւ դատարանը տաս րոպե ընդմիջում հայտարարեց, որից հետո որոշեց, որ պետք է դատարանը գնա խորհրդակցական սենյակ՝ որոշում կայացնելու: Սակայն, խորհրդակցական սենյակից վերադառնալուց հետո՝ դատավոր Արթուր Մկրտչյանը կրկին մերժեց պաշտպանական կողմի միջնորդությունը:
Կարդացեք նաև
«Քրեական դատավարության օրենսգրքի կոպիտ խախտում թույլ տվեց դատավորը, որովհետեւ կան որոշակի որոշումներ, որոնք դատարանը պարտավոր է կայացնել խորհրդակցական սենյակում, կան որոշումներ, որ դատարանը կարող է ինքը որոշել՝ խորհրդակցական սենյակում կայացնե՞լ, թե՞ տեղում: Բայց փորձաքննություն նշանակելու միջնորդությունը պետք է քննարկեր խորհրդակցական սենյակում, ինչը ինքը չարեց: Բայց եթե նա նույնիսկ հեռանար եւ խորհրդակցական սենյակում կայացներ որոշումը, աբսուրդ է նման որոշումը, որովհետեւ մեղադրանքի հիմքում դրվում է Վրթանեսյանի ցուցմունքը»,- իրավիճակն այսպես գնահատեց Լուսինե Սահակյանը:
Հաջորդ դատական նիստը նշանակվել է մարտի 11-ին:
Հիշեցնենք՝ Արգիշտի Կիվիրյանը 2013 թվականի օգոստոսի 24-ին մասնակցել է Կոմիտաս 5 հասցեում կառուցվող բազմահարկ շենքի դեմ բողոքի ակցիայի: Նա հաղորդում էր տվել, որ ոստիկանները ոստիկանության բաժանմունք տանելիս բռնություն են գործադրել իր նկատմամբ: Սակայն քրեական գործ է հարուցվել ոստիկանի հաղորդման վրա, ըստ որի՝ Կիվիրյանը ոստիկանին հարվածել եւ ինքն իրեն վնասել է:
Ամի ՉԻՉԱԿՅԱՆ
