1-ին օմբուդսմեն Լարիսա Ալավերդյանի կարծիքով, Սումգայիթյան ջարդերի վերաբերյալ կան բավականաչափ նյութեր, որոնց հիման վրա կարելի է փաթեթ կազմել եւ առաջ քաշել պահանջատիրության հարցը:
«Անշուշտ Սումգայիթում տեղի է ունեցել ցեղասպանություն նույն նպատակով, ոչ միայն հայաթափել ու յուրացնել նյութական արժեքները, այլեւ բնաջնջել ու յուրացնել մշակութային բոլոր արժեքները»,- ասաց տիկին Ալավերդյանը:
Ըստ նրա, 1988-ին, երբ Սումգայիթից հայ փախստականները Հայաստան էին գալիս, գլխավոր դատախազության կողմից կազմվել են հազարավոր արձանագրություններ ու ներկայացվել նույնիսկ ՄԱԿ-ում, բայց խորհրդային միության փլուզման ժամանակահատվածն էր ու պետական մակարդակով հայկական կողմը հետեւողական չի եղել:
Լարիսա Ալավերդյանը առաջիկայում նամակով դիմելու է ԱԳՆ-ին արդարադատության նախարարությանը՝ առաջարկելու, որ կառավարությանը ներկայացնեն աշխատանքային խումբ ստեղծելու նախաձեռնություն եւ այդ խմբի աշխատանքի համար հատկացվեն պայմաններ. «Մենք պետք է դիմենք պատկան մարմիններին, որ առանձնացվեն ոչ միայն ֆինանսներ, այլեւ մասնագետներ, այսօր արդեն էնտուզիազմի վրա աշխատել հնարավոր չէ»:
Կարդացեք նաև
Արփինե ՍԻՄՈՆՅԱՆ
