Այսօր մարզական լրագրողների հետ հանդիպման ժամանակ ՀՀ սպորտի եւ երիտասարդության հարցերի նախարար Գաբրիել Ղազարյանը տեղեկացրեց, որ նախնական պայմանավորվածության համաձայն, ինքը մոտ ժամանակներս հանդիպելու է ՌԴ սպորտի նախարարին: Նպատակը` մարզական գիտության ոլորտում նրանց փորձի խորն ուսումնասիրումն է: «Ինչպես Բելառուսում, այնպես էլ` Ռուսաստանի Դաշնությունում, այդ ոլորտը բարձր հիմքերի վրա է դրված ու միջազգային մրցասպարեզներում նրանց մարզիկների մեդալները պատահական երեւույթ չեն: Նրանց համար օլիմպիական բազմաթիվ ոսկե մեդալները սովորական նորմալ երեւույթ են, իսկ մեզ համար` առայժմ բարի ցանկություն: Համոզված եմ, որ նրանց առաջավոր փորձն ուսումնասիրելը եւ կիրառելը կօգնի, որպեսզի մեր մարզիկների արդյունքներն էլ հասնեն այդպիսի մակարդակի», – ասաց նախարարը:
Աշոտ ՀԱԿՈԲՅԱՆ
