Ցյուրիխում ընթացած շախմատային գերմրցաշարի շրջանակներում խաղատախտակի առջեւ հանդիպում էր կազմակերպվել նաեւ համաշխարհային շախմատի լեգենդներ, 85-ամյա Վիկտոր Կորչնոյի, որը ներկայացնում է Շվեյցարիան եւ գերմանացի, 80-ամյա Վոլֆգանգ Ուլմանի միջեւ, որն ավարտվել էր 2:2 հաշվով:
Վիկտոր Կորչնոյը ծնվել է Սանկտ-Պետերբուրգում, ԽՍՀՄ-ում է դարձել գրոսմայստեր, նվաճել շախմատային բազմաթիվ բարձունքներ: Սակայն 1976 թվականին Ամստերդամում անցկացված միջազգային մրցաշարի ավարտից հետո մնացել է Հոլանդիայում, հետո տեղափոխվել Շվեյցարիա:
Chess-news.ru-ի փոխանցմամբ, ցյուրիխյան մրցապայքարի ավարտին շախմատային հայտնի մեկնաբան, գրոսմայստեր Եվգենի Սուրովը զրուցել է Վիկտոր Կորչնոյի հետ: Զրույցից պարզվել է, որ վետերանն այնքան էլ բարձր կարծիք չունի աշխարհի չեմպիոնի մասին եւ որ Գարրի Կասպարովն ավելի բարձր է, քան Անատոլի Կարպովը:
Սուրովի եւ Կորչնոյի միջեւ կայացել է նաեւ այսպիսի զրույց:
– Ի՞նչ եք մտածում Գարրի Կասպարովի քաղաքական հայացքների մասին:
– Կասպարովն ու Կարպովը ինչ-որ ընդհանուր բան ունեն. Երկուսն էլ դումայի պատգամավոր են ուզում դառնալ:
– Կարպովն արդեն պատգամավոր է:
– Տեսնո՞ւմ եք:
– Կասպարովն է՞լ այդպիսի ամբիցիաներ ունի:
– Այո: Այդպես է ստացվում:
– Բայց նա երկու տարի առաջ արտագաղթել է Ռուսաստանից եւ այդ ժամանակվանից չի վերադառնում՝ վախենալով ձերբակալվելուց:
– Ճիշտ է վարվում:
Աշոտ ՀԱԿՈԲՅԱՆ
Լուսանկարը՝ chess-news.ru-ի
