«Սխալների մի մասը գալիս է Ծառուկյանի քաղաքական փորձառության պակասից, իսկ մեծագույն մասը՝ ԲՀԿ-ի ներսում գործող խառնակիչների մի փոքրիկ խմբակից, որն ուղղորդվում է բոլորովին մի այլ կենտրոնից եւ հետամուտ է բոլորովին մի այլ ծրագրի։ Թե՛ Ծառուկյանին, թե՛ Բարգավաճ Հայաստանին, եւ թե՛ Համաժողովրդական շարժմանը ոչ ոք այնքան վնաս չի տվել, որքան այդ խմբակի՝ մեծ վերլուծաբանների հավակնություն ունեցող մի քանի անդամները»,- առաջին նախագահ Լեւոն Տեր-Պետրոսյանը ԲՀԿ առաջնորդ Գագիկ Ծառուկյանի անցած ճանապարհի մասին պատմող իր «Սրտի պարտքը» հոդվածում այսպիսի գնահատական էր տվել:
Այս առնչությամբ Aravot.am-ի հետ զրույցում քաղաքագետ Արմեն Բադալյանը վստահեցրեց, որ չգիտի, թե ում նկատի ունի Տեր- Պետրոսյանը, ովքեր են ԲՀԿ-ի ներսի խառնակիչները եւ գուշակություններով չի ուզում զբաղվել: Կոնկրետ ինքը ԲՀԿ-ում խառնակիչների չի տեսնում. «Տեսնում եմ գործիչներ, որոնք իրենց տարբեր տեսակետներն ունեն կուսակցության, ապագայի վերաբերյալ եւ կուսակցության քայլերի հետ կապված»:
Արմեն Բադալյան
Անդրադառնալով Գագիկ Ծառուկյանի եւ Սերժ Սարգսյանի՝ վերջին օրերի քայլերին՝ հակամարտությանը, դրան հաջորդած հանդիպմանը ՝ Արմեն Բադալյանն ասաց. «Քաղաքականության մեջ չեն կռվում ու բարիշում: Լինում են ակտիվ կամ ոչ ակտիվ: ԲՀԿ-ն ու եռյակը մնում են ՀՀԿ-ի մրցակիցները, շարունակում են իրենց նախկին քաղաքականությունը: Որեւիցե ողբերգություն, որեւիցե խուճապային տրամադրություն, պարտություն ես այստեղ չեմ տեսնում: Ուղղակի գործընթացը ցույց տվեց եռյակի մաս կազմող կուսակցություններին, որ մասնավորապես, ԲՀԿ-ի ներսում կան որոշակի խնդիրներ, որոնք պետք է լուծվեն: Այդ խնդիրները լուծվելուց հետո ինչպես ԲՀԿ-ն, այնպես էլ ՀԱԿ-ը ամենայն հավանականությամբ, կշարունակեն իրենց պայքարը՝ իրենց առջեւ եղած նպատակներն իրականացնելու համար: Այն է՝ ՀՀ-ում նոր իշխանություն ձեւավորելը: Դա կլինի հերթական ընտրությունների միջոցով, թե արտահերթ՝ այնքան էլ էական չէ»:
Նա վստահ է, որ Գագիկ Ծառուկյանն անկեղծորեն ցանկացել է իշխանափոխություն անել, բայց չի ստացվել. «Ինչո՞ւ պետք է մտածեմ, որ Գագիկ Ծառուկյանն անկեղծ չէր: Իշխանափոխության օլիգարխներն էլ են անում: Վրաստանում իշխանափոխություն արեց օլիգարխ Իվանիշվիլին, Ուկրաինայում՝ Պյոտր Պորոշենկոն: Ուղղակի Հայաստանում է դա տարօրինակ դիտվում: Աշխարհի շատ երկրներում դա նորմալ երեւույթ է, երբ մի համակարգի օլիգարխը իշխանափոխություն է իրականացնում»:
Կարդացեք նաև
Ի՞նչը կարող էր ստիպել Գագիկ Ծառուկյանին, որը խոսում էր հուժկու հանրահավաքների, ժողովրդին ոտքի հանելու մասին, չեղյալ համարել հանրահավաքները, ինչո՞վ են վախեցրել Գագիկ Ծառուկյանին՝ Արմեն Բադալյանը պատասխանեց. «Ոչ մեկը ոչ մեկին չի վախեցրել: Քաղաքականությամբ զբաղվողը չպետք է վախենա: Որեւէ երաշխիք չկար, որ փետրվարի 20-ի հանրահավաքին իշխանությունների կողմից չէր հրահրվի անկարգություններ, ինչը իշխանություններին լեգիտիմ իրավունք կտար բռնություն կիրառել հանրահավաքի մասնակիցների նկատմամբ: Առավել եւս, որ փետրվարի 20-ի հանրահավաքն արտոնված չէր քաղաքապետարանի կողմից, ինչը իշխանությանը հնարավորություն կտար բռնություններ իրականացնել եւ թույլ չտալ հանրահավաքի իրականացումը»:
Հռիփսիմե ՋԵԲԵՋՅԱՆ
