Կենտրոն եւ Նորք-Մարաշ վարչական շրջանների ընդհանուր իրավասության դատարանում շարունակվեց Գոռ Առաքելյանի (ԱԺ պատգամավոր Կարո Կարապետյանի փեսայի), Վալերի Հովհաննիսյանի եւ Ներսես Մելքոնյանի նկատմամբ հարուցված քրեական գործով դատական նիստը: Դատարան դարձյալ չէին ներկայացել երեք տուժողները, որոնք անցյալ տարվա մայիսին հրազենային վնասվածքներ էին ստացել Վերնիսաժ կոչվող տոնավաճառում:
Մեղադրողը դատարանին ներկայացրեց «Մակարով» տիպի ատրճանակը՝ ապացույցը, որը հետազոտվեց, դրանով իսկ ավարտվեց ապացույցների հետազոտման փուլը ընդհանրապես:
Այսօր դատարան էր ներկայացել վկա Վարդան Զոհրաբյանը եւ փորձագետ Ռուդիկ Պողոսյանը: Ռ. Պողոսյանն ասաց, որ երկու ելքային հրազենային վնասվածք է եղել ամբաստանյալ Վալերի Հովհաննիսյանի վարտիքի եւ անդրավարտիքի վրա եւ մեկ վնասվածք էլ վերնաշապիկին: Ըստ նրա՝ կրակոցի ուղղությունը եղել է վերեւից ներքեւ (դա խոսում է պաշտպանական կողմի այն պնդման մասին, որ կրակողը նպատակ չի ունեցել կյանքի համար վտանգավոր կրակոց արձակել): Ըստ փորձագետի, կրակոցը եղել է պատահական:
Վկա Վարդան Զոհրաբյանը նախաքննության ժամանակ ցուցմունք էր տվել, որ Գոռ Առաքելյանը դուրս է եկել իր մեքենայից եւ ինքը տեսել է, որ նա 2-3 կրակոց է արձակել Վալերի Հովհաննիսյանի հետեւից, որը վազում էր Վերնիսաժից Խանջյան փողոցի ուղղությամբ:
Կարդացեք նաև
Ի դեպ, այս վկան մասնակցել էր նաեւ դեպքի վայրի զննությանը: Վկան դատարանում ասում էր, որ մոտավորապես է հիշում եւ ասաց, որ 2 կրակոցն է հիշում՝ Վալերի Հովհաննիսյանի ուղղությամբ արձակված: Իսկ երբ դատավարության կողմերից փորձեցին ճշտել, թե ուղղություն ասելով ինչ նկատի ուներ, նա ասաց, որ խառնաշփոթ էր ստեղծվել եւ ինքը չի տեսել, թե որ ուղղությամբ է Գոռ Առաքելյանը կրակել:
Գոռ Առաքելյանի պաշտպան Երեմ Սարգսյանի հարցին, թե ի վերջո պարզվել է, որ 5 կրակոց է եղել դրսում, որից մեկը կպել է գետնին եւ հնարավո՞ր է, որ դրսում վկայի տեսած կրակոցներից մեկն էր դա, վկան չբացառեց, ասելով՝ հնարավոր է:
Քանի որ այլ վկաներ այսօր դատարան չէին եկել, դատական նիստը հետաձգվեց եւ նշանակվեց մարտի 4-ին:
Նկատենք, որ պաշտպանական կողմից ոչ ամբաստանյալ Ներսես Մելքոնյանը եւ ոչ նրա պաշտպան Վարդուհի Էլբակյանը դեռեւս հարցեր չեն տվել:
Ռուզան ՄԻՆԱՍՅԱՆ
