Փետրվարի 19-ին Հայաստանում Եվրոպական միության պատվիրակությունը ԵՊՀ Սարգիս և Մարի Իզմիրլյանների անվան գրադարանում կազմակերպել էր տեղեկատվական միջոցառում: Այն անցկացվեց Հայաստանի բուհերի աշխատակազմի համար փետրվարի 17-19-ը Երևանում կազմակերպվող եռօրյա ուսուցողական դասընթացների վերջին օրը: ԵՄ երեք փորձագետների մասնակցությամբ դասընթացի թեման էր ուսումնառության վերջնարդյունքների կազմումը, ուսանողների գիտելիքի, հմտությունների և կարողությունների մակարդակի գնահատումը, մասնավորապես այնպիսի մեթոդներով, ինչպիսիք են ֆորմալ և ոչ ֆորմալ քննությունները, մասնակցությունը դասին, առաջադրանքների կատարումը, ինքնագնահատումը, գնահատումը համակուրսեցիների կողմից և այլն, ինչպես նաև կրթական մոդուլներում Կրեդիտների կուտակման և փոխանցման եվրոպական համակարգի (ԿԿՓԵՀ) կիրառումը: Դասընթացին մասնակցեց շուրջ 30 մասնագետ Երևանի 12 համալսարաններից:
Դասընթացն անցկացվեց ԵՄ աջակցությամբ հոկտեմբերի 1-ից մեկնարկած «Հայաստանի բարձրագույն կրթության զարգացում եվրոպական բարձրագույն կրթական տարածքին ինտեգրվելու նպատակով» երկամյա Թվինինգ ծրագրի շրջանակներում, որի բյուջեն կազմում է 1մլն եվրո:
Ծրագրի համընդհանուր նպատակն է ապահովել ՀՀ և Եվրոպայի բարձրագույն կրթության համատեղելիությունը և հնարավորություն ապահովել, որպեսզի ուսանողները, աշխատողներն ու շրջանավարտներն օգտվեն շարժունության, որակավորումների միջազգային ճանաչման և Եվրոպական բարձրագույն կրթական տարածքի այլ երկրների բուհերի հետ համագործակցության ընդլայնված հնարավորություններից: Ծրագրում ընդգրկված են Հայաստանի բարձրագույն ուսումնական հաստատությունները և ‹‹Մասնագիտական կրթության որակի ապահովման ազգային կենտրոն›› հիմնադրամը: Ծրագրում ներգրավված են շուրջ 60 միջազգային փորձագետներ Ֆինլանդիայից, Գերմանիայից և Էստոնիայից:
Միջոցառմանը ներկա էր նաև Հայաստանում Եվրամիության պատվիրակության միջազգային օգնության/համագործակցության պատասխանատու Բորիսլավ Դիմիտրովը: «Այս ծրագիրը ևս մեկ քայլ է ԵՄ-Հայաստան համագործակցությունն ամրապնդելու համար: Այն աջակցում է Հայաստանում կրթական բարեփոխումներին, որոնք ընթանում են Բոլոնիայի գործընթացի շրջանակներում: Կրթության հարցերը միշտ դիտարկվել են որպես հանգուցային առաջնորդող խթաններ զարգացման և աշխատատեղերի ստեղծման համար: Սա ևս մեկ հնարավորություն է մասնագիտական կրթությունը համապատասխանեցնելու աշխատաշուկայի պահանջներին: Մենք շատ ուրախ ենք, որ կարող ենք օգնել Հայաստանին կրթական բարեփոխումների ճանապարհին և կիսել մեր փորձառությունը»,- նշեց ԵՄ ներկայացուցիչը:
Կարդացեք նաև
ՀՀ ԿԳՆ բարձրագույն և հետբուհական մասնագիտական կրթության վարչության պետ Ռոբերտ Սուքիասյանն իր ելույթում անդրադարձավ ծրագրից ակնկալվող արդյունքներին. «Այս ծրագիրը հնարավորություն կտա սահուն կերպով ինտեգրվել եվրոպական բարձրագույն կրթական տարածքին: Ես համոզված եմ, որ մենք կկարողանանք լուծել մեր առջև դրված խնդիրները: Մենք ներգրավվել ենք բազմաթիվ հմուտ մասնագետների և՛ գերմանական, և՛ ֆիննական կողմից և փորձելու ենք գտնել նորագույն լուծումներ»:
Հայաստանում Թվինինգ ծրագրի մշտական խորհրդատուն է Կարլ Հոլմը, ով իր ելույթում նշեց, որ կրթության նկատմամբ սերը բավարար չէ որակյալ կրթական համակարգ ունենալու համար. «Թվում է, թե բոլորը սիրում են կրթությունը: Բայց միայն սերը կրթության նկատմամբ բավական չէ: Պետք է ունենալ նախ՝ կառավարում, ապա՝ ամուր օրենսդրություն: Մենք այստեղ ենք, որպեսզի օգնենք Հայաստանին այս հարցում: Օրենսդրական դաշտում մենք շատ սերտորեն աշխատելու ենք շահառուների հետ՝ Հայաստանի կրթության և գիտության նախարարության և որակավորման ազգային կենտրոնի հետ»:
Եռօրյա դասընթացներին ներկա էր նաև Ֆինլանդիայի Տուրկուի համալսարանի պրոռեկտոր Ռիտա Պիկյոն, ով ներկայացրեց Բոլոնիայի գործընթացում Հայաստանի առաջընթացն ապահովելու վերաբերյալ ԵՄ մասնագիտական տեսակետը:
Առաջիկա ամիսներին վերոնշյալ խորագրով դասընթացներ կանցկացվեն ինչպես Երևանում, այնպես էլ Հայաստանի այլ մարզերում. նախատեսվում է բուհերի պրոֆեսորադասախոսական և ադմինիստրատիվ աշխատակազմերի՝ ուսումնառության վերջնարդյունքներով զբաղվող ավելի քան 90 ներկայացուցչի մասնակցություն: Այս դասընթացները Բոլոնիայի սկզբունքներին համահունչ ՀՀ նոր օրենսդրության մշակման գործընթացի մի մասն են:
Մամլո հաղորդագրություն
