Փետրվարի 21-ին Բեռլինում կայանալու է WBO վարկածով 2-րդ միջին քաշային կարգում Գերմանիան ներկայացնող հայ պրոֆեսիոնալ բռնցքամարտիկ Արթուր Աբրահամի եւ բրիտանացի Փոլ Սմիթի ռեւանշ մենամարտը:
Մարտից առաջ «Արքա Արթուրը» Ring.tv-ի հետ հարցազրույցում խոսել է այդ իրադարձության եւ բռնցքամարտում իր ապագա ծրագրերի մասին:
– Ի՞նչ մտքեր ունես ռեւանշ մենամարտից առաջ:
– Առաջին մենամարտից հետո հրավիրված մամուլի ասուլիսում Փոլ Սմիթին ասացի, որ ես պատվի մարդ եմ եւ եթե նա ռեւանշ է ուզում, կկատարեմ նրա ցանկությունը: Վստահ եմ, որ այն մարտում ես հաղթել եմ ռաունդների առնվազն 8-4 հարաբերակցությամբ: Բայց ես դժգոհ եմ իմ մրցելույթից, քանի որ կարող եմ ավելի լավ մենամարտել: Փետրվարի 21-ին գալու է նոկաուտով հաղթելու ժամանակը:
Կարդացեք նաև
– Առաջին մենամարտը կայացել է սեպտեմբերին եւ դու մրցավարների միաձայն որոշումով հաղթել ես մեծ առավելությամբ: Այն մենամարտի մասին ի՞նչ կասես:
– Վեց կամ յոթ ռաունդ ես վերահսկում էի տեմպը, արագությամբ գերազանցում էի նրան եւ հաղթել եմ դրանցից յուրաքանչյուրում: Հետո արդեն ձգտում էի մարտը ժամանակից շուտ ավարտել, փոխանակ շարունակեի այնպես, ինչպես դրանից առաջ:
– Սմիթի հետ ռինգում 12 ռաունդ անցկացնելուց հետո ի՞նչ կասես նրա ունակությունների մասին:
– Սմիթը ռինգ մտել էր հաղթելու նպատակով: Նա ուժեղ կամք եւ հարվածային լավ տեխնիկա ունի: Ես նախապես գիտեի նրա ուժեղ կողմերը: Սմիթը հանդես եկավ այնքան լավ, որքան կարող էր: Սակայն ես կարող եմ ավելի լավ հանդես գալ, քան սեպտեմբերին: Նա այս անգամ կկարողանա՞ կրկնել իր մրցելույթը, կտեսնենք փետրվարի 21-ին:
– Փոլն ավելի լավը չէ՞ր, քան դու մտածում էիր:
– Նա ցույց տվեց հենց այն, ինչ ես սպասում էի:
– Շուտով 35 տարեկան կդառնաս: Դեռ կարծում ես, որ հնարավորություններիդ գագաթի՞ն ես: Դեռ որքա՞ն ժամանակ կարող ես հանդես գալ բարձր մակարդակով:
– Կարծում եմ՝ եւս 2-3 տարի: Ես հաճույքով եմ բարձունքում ժամանակ անցկացնում եւ հեռանալու մասին մտածելու պատճառ չունեմ:
– Դու երկու քաշային կարգերում աշխարհի չեմպիոն ես, մենամարտել ես միջին եւ երկրորդ միջին քաշային կարգերի լավագույն բռնցքամարտիկների հետ: Բռնցքամարտում էլի ի՞նչ նպատակներ ունես:
– Ակնհայտ է՝ վերադարձնել Անդրե Ուորդից եւ Կարլ Ֆրոչից կրած պարտությունները: Բայց կան նաեւ Ռոբերտ Շտիգլիցի եւ Ֆելիքս Շտուրմի հետ մենամարտերը:
– Ռեւանշ մենամարտից առաջ Փոլ Սմիթին որեւէ ուղերձ ունե՞ս:
– Ցանկություններիդ հետ զգույշ եղիր: Փետրվարի 21-ին գալու է «Դատաստանի օրը»:
Պատրաստեց ԱՇՈՏ ՀԱԿՈԲՅԱՆԸ
«Առավոտ» օրաթերթ
18.02.2015
