Հաճախ կարելի է լսել, որ տոնային քսուքը փչացնում է մաշկը, խցանում ծակոտիները, ուստի չի կարելի այն օգտագործել ամեն օր։ Բայց այս կարծիքը կոսմետոլոգ Անուշ Շիրվանյանը հնացած է համարում։ «Ժամանակակից տոնային քսուքները ոչ միայն չեն փչացնում մաշկը, այլ կարող են բարենպաստ ազդեցություն թողնել, քանի որ պարունակում են խոնավեցնող բաղադրատարրեր, մանրէասպան միջոցներ, վիտամիններ, արեւապաշտպան ֆիլտրեր, բուսական մզվածքներ, որոնք պաշտպանում ու հարթեցնում են մաշկը»,- ասաց կոսմետոլոգը:
Տոնային քսուքի ընտրությունը պայմանավորված է մաշկի տեսակով։ Եթե ձեր մաշկը չոր է, ապա մասնագետը խորհուրդ է տալիս ընտրել այնպիսի քսուք, որը խոնավեցնող բաղադրատարրեր եւ ճարպ է պարունակում: Գոյություն ունեն նաեւ յուղոտ մաշկի համար նախատեսված քսուքներ, որոնք առանց ճարպերի են։ Նման քսուքներն ավելի խիտ են, այնքան էլ բարակ չեն նստում, ինչպես` չոր մաշկի համար նախատեսվածները։ Փոխարենը` ըստ մասնագետի, յուղոտ մաշկը մի քիչ չորանում է տոնային քսուքով եւ վերանում է տհաճ փայլը։
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
17.02.2015
