«Իրանը պատրաստ է աջակցել Լեռնային Ղարաբաղի հիմնախնդրի կարգավորման գործընթացին»,- այս մասին, ըստ «Ինտերֆաքսի», այսօր Բաքվում Ադրբեջանի արտաքին գործերի նախարար Էլմար Մամեդյարովի հետ ունեցած բանակցություններից հետո կայացած ճեպազրույցի ընթացքում հայտարարել է Իրանի արտաքին գործերի նախարար Մուհամեդ Ջավադ Զարիֆը:
Ըստ Զարիֆի՝ Իրանը, որպես հարևան երկիր, հակամարտության հենց սկզբից ցանկանում էր տեսնել խաղաղ լուծում. «Այս տարածաշրջանը մեզ համար կարեւոր է: Մասնավորապես՝ Ադրբեջանը մեզ համար այս տարածաշրջանի ամենակարեւոր երկրներից մեկն է, քանի որ մեզ կապում են պատմական եւ մշակութային արժեքներ»,- ասել է Իրանի ԱԳ նախարարը:
Իր հերթին Ադրբեջանի ԱԳ նախարար Է.Մամեդյարովը նշել է, որ տարածաշրջանում խաղաղության ամբողջական վերականգնման համար լուրջ քայլեր են անհրաժեշտ:
Նա նաեւ ընդգծել է, որ ԵԱՀԿ Մինսկի խմբի համանախագահները սահմանագծում հրադադարի ռեժիմի խախտման վերաբերյալ իրենց անհանգստությունները հայտարարելու փոխարեն՝ պետք է ստիպեն Հայաստանին դուրս բերել զորքերը Ադրբեջանի տարածքից: «Այդ դեպքում հրադադարի ռեժիմի խախտումներ չեն լինի եւ մենք կկարողանանք խաղաղություն հաստատել Հարավային Կովկասում, մասնավորապես՝ Հայաստանի եւ Ադրբեջանի միջեւ»,- ասել է Մամեդյարովը:
Կարդացեք նաև
Պատրաստեց Աշոտ ԻՍՐԱԵԼՅԱՆԸ
