Հունվարի 30-ին կրթության եւ գիտության նախարար Արմեն Աշոտյանը հրամաններ է ստորագրել Հայաստանի մի շարք ուսումնական հաստատությունների տնօրենների նկատմամբ կարգապահական տույժեր կիրառելու մասին: Ըստ նախարարության կայքի՝ կարգապահական տույժերը կիրառվել են աշխատանքային պարտականությունները ոչ պատշաճ կատարելու, սովորողների հաճախումների ու ուսումնառության գործընթացում թերացումների համար:
Ի թիվս այլ կարգապահական տույժերի՝ «խիստ նկատողություն» է կիրառվել Բերդի ավագ դպրոցի տնօրեն Արթուր Մելիքյանի, «նկատողություն»՝ Իջեւանի ավագ դպրոցի տնօրեն Արմեն Խոջայանի նկատմամբ:
Արթուր Մելիքյանը 2000-2011թթ. որպես տնօրեն աշխատել է Բերդ քաղաքի թիվ 3 միջնակարգ դպրոցում, 2011թ.-ից ցայսօր աշխատում է որպես ՀՀ կրթության եւ գիտության նախարարության ենթակայության ներքո գործող Բերդի ավագ դպրոցի տնօրեն: Ա. Մելիքյանին հարցրինք, թե ինչո՞ւ է արժանացել Արմեն Աշոտյանի «խիստ նկատողությանը»: Նա ասաց, որ թյուրիմացություն է եղել, որ իրականում այլ դպրոցի տնօրեն պետք է արժանանար այդ տույժին:
Այդ մասին հարցրինք, ԿԳՆ հանրակրթության վարչության պետ Նարինե Հովհաննիսյանին, վերջինս խորհուրդ տվեց դիմել նույն նախարարության կադրերի վարչություն: Այնտեղից հայտնեցին, որ իսկապես թյուրիմացություն է եղել, Ա. Մելիքյանի անունը հանվել է կարգապահական տույժ ստացած տնօրենների ցանկից:
Կարդացեք նաև
Իջեւանի ավագ դպրոցի տնօրեն Արմեն Խոջայանն ասաց, որ կրթության եւ նախարարի կողմից տույժ է ստացել այն պատճառով, որ ստուգման ժամանակ ավագ դպրոցում շատ են եղել աշակերտների բացակայությունները: Ըստ Ա. Խոջայանի՝ այդ բացակայություները պայմանավորված էին այդ ժամանակ սովորողների շրջանում տարբեր հիվանդությունների վիրուսների տարածմամբ:
Նրան հարցրինք՝ Իջեւանի ավագ դպրոցի տնօրենի՝ մասնագիտական կրթական աջակցությունների գծով տեղակալ Լյուբա Իսախանյանը քանի՞ տարեկան է: Խոջայանն ասաց, որ վերջինս 71 կամ 72 տարեկան է, բացի վարչական աշխատանքից Լ. Իսախանյանը դպրոցում դասեր չի պարապում:
Նշենք, որ Տավուշի մարզում շարունակում են գործել բազում կրկնուսույցներ, ավագ դպրոցների շատ աշակերտներ բուհեր ընդունվելու համար կրկնուսույցներին վճարում են:
Ոսկան ՍԱՐԳՍՅԱՆ
Աշակերտը դասի չգա տնօրենը պատժվի անոմակ կառավարման տեսակ:
Այս տարի Այգեձորի միջնակարգ դպրոցի փոխտնօրենը կտոնի իր 80-ամյակը:Դրան ի՞նչ կասեք հարգելի Ոսկան.իմիջայլոց նա նաև դասավանդում է: