Salesboom.am-ը առցանց գնումների բավականին տարածված կայք է: Այնտեղ համապատասխան կտրոններ գնելով կարելի է տարբեր ռեստորաններում, ժամանցի, հանգստի եւ այլ վայրերում ստանալ զեղչեր: Վճարումները կատարվում են Arca վիրտուալ քարտով, MasterCard կամ Visa քարտով, Idram համակարգով եւ Telcell, MegaPay համակարգերի տերմինալների միջոցով:
Բայց այս դեպքում էլ կան որոշակի խնդիրներ, որոնց հանդիպեցինք վերջերս: Փետրվարի 4-ին որոշեցինք գնել «Պեկին» չինական ռեստորանի 50% զեղչ նախատեսող կուպոն: Վճարումն իրականացրեցինք Arca վիրտուալ քարտի միջոցով: Սովորաբար վճարումը կատարելուց հետո 30 րոպեի ընթացքում կայքի անձնական էջում հայտնվում է կուպոնը, իսկ բջջային համարին կարճ հաղորդագրություն է գալիս, որն իր մեջ պարունակում է կուպոնի համարը:
Մեր գնած կուպոնը ոչ 30 րոպեից, ոչ էլ 10 օրվա ընթացքում չստացանք: Փետրվարի 5-ին որոշեցինք այդ խնդրով դիմել Salesboom.am կայքի աշխատակազմին: Հաճախակի տրվող հարցերի բաժնում հրապարակված էլեկտրոնային փոստով գրեցինք խնդրի մասին (նկարում): Կայքում նաեւ կա «Հետադարձ կապ» բաժինը, որի միջոցով նույնպես գրեցինք խնդրի մասին:
Անցել է 9 օր եւ ոչ մի պատասխան չենք ստացել: Նշենք, որ Arca վիրտուալ քարտի մեր էջում (նկարում) գրվում է, որ քարտից վճարված գումարը հանվել է:
Հանուն արդարության պետք է նշել, որ ծառայություններից օգտվում ենք ոչ առաջին անգամ: Գնումները միշտ կատարել ենք Telcell համակարգի տերմինալների միջոցով եւ որեւէ խնդիր չի առաջացել, բայց Arca վիրտուալ քարտի դեպքում եղավ խնդիր եւ լուծում դեռեւս չկա:
Աշոտ ԻՍՐԱԵԼՅԱՆ
