Նախորդ տարեվերջից սկսված ակտիվ քաղաքացիներին ծեծի ենթարկելու, նրանց գույքը վնասելու դեպքերով հարուցված քրեական գործերը այդպես էլ մնացին չբացահայտված: Չնայած արդեն կատարվածից ամիսներ են անցել, բայց տուժողները պնդում են, որ հարուցված քրեական գործերը փակուղի են մտել:
«Հիմնադիր խորհրդարանի» անդամ Վարդան Հակոբյանի մեքենան էին այրել, այրողին չեն գտել, բայց մեքենայի վնասի չափն են գնահատել ու հայտնել. «Հանցագործության բացահայտման գործում ոչ մի առաջընթաց, միայն երկու օր առաջ ծանուցում էի ստացել Երեւան քաղաքի վարչություն ներկայանալու համար: Ներկայացա, ինձ տեղեկացրին, թե ինչքան են գնահատել իմ մեքենայի վնասի չափը, մի քիչ, բայց մոտավորապես համընկնում էր իմ ներկայացրածին: Վնասի չափի այս գնահատումը թույլ կտա ինձ, որ երբ հանցագործը բացահայտվի, կարողանամ դիմել դատարան ու փոխհատուցում պահանջել: Բայց հանցագործը չկա, ումից փոխհատուցում պահանջեմ: Հանցագործի բացահայտման վերաբերյալ քննիչը ասաց, որ հարեւանները ոչինչ չեն տեսել., ոչինչ չեն գտել: Եթե քննչական մարմինները հույսները դրել են, թե հարեւաններն ինչ կասեն, իրենց տեղեկացրի՝ դրան մի սպասեք: Բնակչության 90 տոկոսը, եթե նույնիսկ իմանա էլ՝ ովքեր են արել, չի վստահում ոստիկանությանը եւ չի ուզում շփվել, առավել եւս օգնած լինել»:
Վարդան Հակոբյանը այս գործը արդեն փակուղի մտած գործ է համարում:
Արփինե ՍԻՄՈՆՅԱՆ
