Հայտնի են դարձել Մինսկում ընդունված «Մինսկի համաձայնագրի կատարման համալիր գործողությունների» փաստաթղթի կետերը: Փաստաթուղթը ներառում է 13 հիմնական կետեր: Առաջին կետով սահմանվում է, որ Դոնբասում փոխհրաձգությունը պետք է դադարեցվի Կիեւի ժամանակով փետրվարի 15-ին ժամը 00:00-ից սկսած:
ՌԴ նախագահի կայքում հրապարակված փաստաթղթի համաձայն՝ երկրորդ կետով համաձայնեցված է ծանր զինատեսակների դուրսբերումը եւ անվտանգության գոտու ստեղծում ամենաքիչը 50 կմ շառավղով: Կողմերը պայմանավորվել են ապահովել ԵԱՀԿ-ի կողմից հրադադարի ռեժիմի պահպանման եւ ծանր տեսակների դուրսբերման մոնիտորինգ հենց առաջին օրվանից:
Ըստ փաստաթղթի՝ Դոնբասում հատուկ ռեժիմը պետք է հաստատվի Ուկրաինայի «Դոնեցկի եւ Լուգանսկի տարածաշրջանների առանձին մասերում ժամանակավոր կարգուկանոնի ապահովման» մասին օրենքի համապատասխան, իսկ ռեժիմի գործողության տարածքը պետք է ամրագրվի ոչ ուշ քան 30 օրից Ուկրաինայի Գերագույն ռադայի որոշմամբ, հիմնվելով Մինսկի հուշագրում սահմանված սահմանագծով:
Ուկրաինան պարտավորվել է ներում շնորհել եւ ազատ արձակել իրադարձությունների մասնակիցներին հետապնդումը եւ պատիժը արգելող օրենքի ընդունման միջոցով: Բոլոր գերիները պետք է ազատ արձակվեն կամ փոխանակվեն: Այս գործընթացի ավարտի վերջնաժամկետը զորքերի դուրսբերումից հետո 5-րդ օրն է:
Կարդացեք նաև
Պատրաստեց Աշոտ ԻՍՐԱԵԼՅԱՆԸ
