Կարգավորիչ գիլյոտին ծրագրի շրջանակներում այսօր կառավարությունը մի շարք առաջարկություններ ընդունեց՝ ուղղված բիզնես-պետություն հարաբերությունների պարզեցմանը: Օրենսդրության կարգավորման ազգային կենտրոնի տնօրեն Արմեն Եղիազարյանը կառավարության նիստում ասաց, որ մասնավորապես, առաջարկվում է առևտրի իրականացման վայրի կազմակերպման, օղու ներմուծման և թանկարժեք մետաղներից պատրաստված իրերի հարգորոշման և հարգադրոշման գործունեությամբ զբաղվող լիցենզիայի փոխարեն սահմանել նախնական ծանուցման գործընթաց, հաշվառման կարգ և հաշվառումը մերժել միայն պետական տուրքը չվճարելու դեպքում:
Կառավարության ընդունած մեկ այլ որոշման համաձայն՝ հանվում է առևտրի իրականացման վայրի կազմակերպչի կողմից յուրաքանչյուր եռամսյակ վաճառատեղերի և վաճառողների վերաբերյալ հաշվետվության ներկայացման պահանջը: Հանվում է նաև այն պահանջը, որ հացի փաստաթղթերում պետք է նշվեր վառարանից հանելու ժամը, քաշը: Կառավարությունը որոշեց նաև, որ հանրային սննդի օբյեկտում որպես բարմեն կամ մատուցող աշխատելու համար պարտադիր չէ լինի մասնագիտական պատրաստվածության դիպլոմ, ինչը ցանկացողներին, օրինակ , ուսանողներին հնարավորություն կտա կարճաժամկետ սեզոնային աշխատանք կատարել:
Նելլի ԲԱԲԱՅԱՆ
