Որոշ հոգեբանների կարծիքով՝ վստահ քայլվածքը վախեցնում է հակահասարակական արարքների հակված մարդկանց եւ նրանց հետ պահում նախահարձակ լինելուց: Այդպիսի քայլվածքի տեր մարդը շրջապատի վրա թողնում է կայացած, զուսպ եւ հուսալի մարդու տպավորություն:
Շատերը գիտեն, որ գեղեցիկ կեցվածքն ու քայլվածքը լավ շարժուձեւի անբաժանելի մասն են եւ ամենաինքնատիպ հագուստն անգամ կեցվածք չունեցող մարդուն չի սազում: Ոչ ճիշտ քայլվածքը հոգնեցնում է մարդուն, լարում մկանները, նյարդային համակարգը, իսկ քայլվածքի եւ առողջության վրա մեծ ազդեցություն են թողնում կոշիկները, այդ պատճառով էլ դպրոցահասակ աղջիկներին բժիշկները խորհուրդ չեն տալիս կրել բարձրակրունկ կոշիկներ, քանի որ դրանք կարող են առաջացնել ողնաշարի կամ կոնքագոտու թերություններ: Հարկավոր է միշտ ուղիղ կանգնել, սակայն չպետք է լարվել: Լավ չէ կանգնել հարցական նշանի նման՝ գլուխը, ուսերը կախ, մեջքը կորացրած, ծնկները կիսածալած: Այդպես կանգնելն առաջին հերթին վնաս է թոքերին, քանի որ կրծքավանդակը սեղմվում է:
Ճիշտ քայլվածքը մասնագետները բնութագրում են հետեւյալ կերպ. գլուխը եւ ողնաշարը պետք է լինեն միեւնույն ուղղահայաց գծի վրա, երբ երկար ժամանակ գլուխը առաջ կամ հետ է ուղղվում, ուսերի եւ պարանոցի մկանները լարվում են: Դա կարող է գլխացավերի, ուշադրության անկման պատճառ դառնալ: Թույլ կեցվածքը սովորություն է դառնում, իրանն աստիճանաբար ծռվում է, որի հետեւանքով խախտվում է ներքին օրգանների դիրքը:
Գեղեցիկ կեցվածքն ու քայլվածքը մշտապես պահպանելու համար հարկավոր է զբաղվել մարմնամարզությամբ, օրվա ընթացքում գոնե 30 րոպե տրամադրեք ֆիզիկական վարժություններին:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
11.02.2015
