ՀՔԱ Վանաձորի գրասենյակի աշխատակիցները քիչ առաջ այցելեցին երեկ՝ 2015թ. փետրվարի 10-ին մարտական հենակետում մահացած լեյտենանտ Տիգրան Սիմոնյանի հարազատներին: Տիգրան Սիմոնյանը Վանաձոր քաղաքից էր: Ինչպես հարազատներն են հայտնել՝ Տիգրանն ավարտել էր Վազգեն Սարգսյանի անվան ռազմական ինստիտուտն ու անցել ծառայության:
Արդեն մոտ երկու տարի ծառայում էր Լեռնային Ղարաբաղի ԼՂ Եղնիկներ զորամասում և ըստ հարազատների՝ սիրով էր կատարում իր աշխատանքը: Մոր խոսքերով, Տիգրանը մեծ ցավով էր ընդունել վերջերս Վ. Սարգսյանի անվան ռազմական ինստիտուտում տեղի ունեցած դեպքը, որի ժամանակ սպանվել էր Հայկազ Բարսեղյանը: Զինծառայողի հարազատներից մեկն ասաց, որ Տիգրանի մահվան մասին լուրն իմացել է լրատվամիջոցներից: Հարազատներին դեպքի մասին այլ մանրամասներ դեռևս հայտնի չեն: Այս պահին զինծառայողի հարազատները սպասում են, թե երբ Վանաձոր կբերեն Տիգրանի մարմինը:
Հելսինկյան Քաղաքացիական Ասամբլեայի Վանաձորի գրասենյակ
