«Դա հենց Ռուսաստանի հետ պայմանավորված բան էր, մանևր, որ տեսեք`Հայաստանն իր արտաքին քաղաքականությունը կառուցում է ինքնուրույն»,-այսօր «ՆՅՈՒԹ» մամուլի ակումբում լրագրողների հետ հանդիպմանը անդրադառնալով ԵԽԽՎ-ում Ռուսաստանի դեմ բանաձևին` հայկական պատվիրակության քվեարկությանը, այսպիսի կարծիք հայտնեց արտակարգ և լիազոր դեսպան Արման Նավասարդյանը:
Հիշեցնենք, որ ԵԽԽՎ ձմեռային նստաշրջանի լիագումար նիստում որոշվեց ԵԽԽՎ-ում ՌԴ պատվիրակությանը զրկել ձայնի իրավունքից, ինչին հայկական պատվիրակության անդամները «ձեռնպահ» քվեարկեցին: Ըստ Արման Նավասարդյանի` քվեարկությունն այդ հարցի շուրջ այդ պահին ժամանակի և տարածության մեջ ոչ մի դերակատարություն չի խաղացել:
ԵԽԽՎ հայաստանյան պատվիրակության ղեկավար Հերմինե Նաղդալյանը պարզաբանել էր, թե դա իրավիճակային քվեարկություն էր ու նշել. «Այդ պահին, եթե ուզենայիր էլ, որևէ մեկի հետ որևէ բան չէիր կարող պայմանավորվել։ Դա պարզապես տրամաբանական որոշում էր»: Արման Նավասարդյանը կարծում է, որ, այնուամենայնիվ, պայմանավորվածություն եղել է, եթե գործել են պրոֆեսիոնալ ու նշում. «Ինչքան էլ ասեն` իրար հետ չեն խոսել, նման բան չի լինում: Չեմ բացառում, որ սա նախօրոք պայմանավորված բան էր»:
Տաթև ՀԱՐՈՒԹՅՈՒՆՅԱՆ
