Երևանի Կենտրոն և Նորք Մարաշ վարչական շրջանների ընդհանուր իրավասության դատարանում (նախագահող դատավոր Արայիկ Մելքումյան) շարունակվեց ՀՀ քաղաքացիներ Արման Սահակյանի, Գրիգոր Գևորգյանի և Հովհաննես Մկրտչյանի հայցն` ընդդեմ «Իրավունք» թերթի և նույն թերթի խմբագիր Հովհաննես Գալաջյանի նախնական դատական նիստը:
Պատասխանող կողմի ներկայացուցիչ Լևոն Բաղդասարյանը հայցվոր կողմի պահանջը իրավազուրկ համարեց և հայտարարեց, թե կողմը դատարանի միջոցով փորձում է ազդել ազատ մամուլի վրա:
Հիշեցնենք, որ նախորդ դատական նիստին հայցվոր կողմի ներկայացուցիչ Մարո Խաչատուրյանը ներկայացրեց միջնորդություն` արգելել «Իրավունքի Մեդիա» ՍՊԸ-ին նոր հրապարակումներ հրատարակել մինչև գործով կայացված դատական ակտի ուժի մեջ մտնելը, ինչպես նաև արգելանք դնել պատասխանող Հովհաննես Գալաջյանի դրամական միջոցների և այլ գույքի նկատմամբ հայցագնի չափով:
Դատական նիստի ընթացքում հայցվոր կողմը հիշեցրեց իր մյուս միջնորդության մասին. սանկցիա կիրառել Լևոն Բաղդասարյանի նկատմամբ, սակայն դատարանը կողմին հորդորեց գրավոր ներկայացնել այն: Լևոն Բաղդասարյանը հայտարարեց, թե նման բան չի եղել: Այնուհետև նշեց. «Մենք պատրաստ ենք մտնել դատաքննության թեկուզ այս պահին»:
Կարդացեք նաև
Դատարանը նշանակեց դատաքննություն. հաջորդ դատական նիստը տեղի կունենա 2015-ի մարտի 23-ին ժամը 14.45-ին:
Aravot.am-ի հետ զրույցում Մարո Խաչատուրյանը նշեց, թե պատասխանող կողմը խախտել է հայցադիմումի` երկշաբաթյա ժամկետում պատասխան ներկայացնելու օրենքի դրույթը ու մանրամասնեց. «Ես հայցադիմումը ներկայացրել եմ հունվարի 21-ին, և պատասխանը պետք է ներկայացվեր մինչև փետրվարի 4-ը, սակայն չի ներկայացվել»:
Անդրադառնալով սանկցիա կիրառելու միջնորդությանը` Մարո Խաչատուրյանը մանրամասնեց. «Սանկցիա կիրառելու միջնորդություն եմ ներկայացրել կապված Լևոն Բաղդասարյանի դրսևորած վարքագծի հետ: Նա բազմիցս դատական նիստերին բարձրաձայնում էր համասեռամոլ բառը, որի վերաբերյալ մեր կողմից ներկայացվել է գնահատական, որ այն ատելության, ագրեսիայի կոչ է պարունակում: Իմ նկատառումները հայտնեցի, որ ճիշտ չէ այդպես արտահայտվել մարդու իրավունքների պաշտպանությամբ հանդես եկող իրավաբանին, ճիշտ է օգտագործել նույնասեռական բառը: Սակայն Լևոն Բաղդասարյանը ոչ միայն կրկնեց, այլ պաշտոնապես հայտարարեց` ուր ուզում եք դիմեք, ես համասեռամոլ բառն եմ ասելու և որպես փոխարինող կարող եմ գալուբոյը նշել: Մենք դա որպես ատելության կոչ ենք որակում»:
Հիշեցնենք, որ «Նոր Սերունդ» մարդասիրական հ/կ 3 աշխատակիցները՝ Գրիգոր Գևորգյանը, Արման Սահակյանը և Հովհաննես Մկրտչյանը, դատական հայցով դիմել են դատարան ընդդեմ «Իրավունք» թերթի, որը հրապարակել և հրատարակել էր «Նրանք սպասարկում են միջազգային համասեռամոլ լոբբինգի շահերը. Ազգի և պետության թշնամիների սև ցուցակը» հոդվածը: Կազմակերպության աշխատակիցները պահանջում են հրապարակայնորեն ներողություն խնդրել իրենց պատիվն ու արժանապատվությունը վիրավորելու համար և յուրաքանչյուրին փոխհատուցել 3 մլն դրամ:
Մարո Խաչատուրյանը նաև տեղեկացրեց, որ այս հարցով ստացվել են մի քանի կարծիքներ, որոնք ներկայացրել են դատարան: Մասնավորապես Տեղեկատվական վեճերի խորհրդի կարծիքի համաձայն` այս հրապարակումը որակվում է որպես ատելության և խտրականության հրահրում:
Տաթև ՀԱՐՈՒԹՅՈՒՆՅԱՆ
