Արդեն երրորդ օրն է Հայաստանի տարածքում դիտվում են տեղումներ` հովտային շրջաններում անձրեւ է, իսկ լեռնային շրջաններում այս պահին ձյուն է: Տեղումները կշարունակվեն մինչեւ փետրվարի 15-ը ներառյալ: Այս տեղեկություններն այսօր լրագրողներին «Հայացք» ակումբում հայտնեց ՏԿԱԻՆ «Հիդրոմետ» ծառայության Օդերևութաբանության կենտրոնի պետ Զարուհի Պետրոսյանը:
Ինչպես տեղեկացրեց Զարուհի Պետրոսյանը` փետրվարի 13-ին եւ 14-ին շրջանների մեծ մասում, 14-ին եւ 15 –ին արեւելյան շրջաններում սպասվում են ձյան տեսքով տեղումներ: Փետրվարի 12-ի գիշերը Արարատյան դաշտում սպասվում է ձնախառն անձրեւ. «Փետրվարի 12-ին եւ 14-ին օդի ջերմաստիճանը կնվազի 4-ից 5 աստիճանով` գիշերը հասնելով մինչեւ 5 աստիճան ցրտի, իսկ ցերեկը` 4-ից 7 աստիճան տաքության»:
Նախնական կանխատեսումների համաձայն` մարտ ամսին տեղումների քանակը լինելու է նորմային մոտ. «Այս պահը ցույց է տալիս, որ վստահություն կա, որ տեղումների քանակը շատ կլինի եւ երաշտային չի լինի գարունը: Սովորաբար, երբ նախորդ տարիներին այս ժամանակաշրջանում լինում էր տեղումների սակավություն, դեպքերի 70-80 տոկոսի դեպքում գարնանային տեղումները լինում էին նորմայից զգալիորեն ավել»:
Իսկ այն, որ այս տարի բավականին տաք ձմեռ է, տիկին Պետրոսյանը պայմանավորում է հարավարեւմտյան տաք օդային հոսանքների ներթափանցման գերակշռությամբ:
Կարդացեք նաև
Էլյա ՀՈՎՀԱՆՆԻՍՅԱՆ
