Ավետիսյանների ընտանիքի սպանության գործով տուժողի իրավահաջորդների ներկայացուցիչներից մեկը՝ փաստաբան Թամարա Բաղդասարյանը, «ՉԻ»-ին հայտնեց, որ շրջանառվող հիվանդությունը Պերմյակովի մեղսունակության հետ կապված հարցի պատասխանը չի կարող տալ։
– Պերմյակովի նախկինում ունեցած հիվանդությունը չի զրկում նրան մեղսունակ կամ անմեղսունակ լինելու տարբերակից։ Դա կորոշվի դատահոգեբանա-հոգեբուժական համալիր փորձաքննության եզրակացությամբ, թե կոնկրետ այս հանցագործությունները կատարելիս ինքը եղե՞լ է մեղսունակ, թե ոչ։
– Բայց մինչեւ օրս չի նշանակվել դատահոգեբուժական փորձաքննությունը։ Արդյո՞ք դրա անհրաժեշտությունը չկա։
-Այո, այս պահին չկա նշանակված նման փորձաքննություն։ Իսկ դրա անհրաժեշտությունը ես իմ վստահորդների հետ քննարկում եմ եւ որ պահին զգանք դրա անհրաժեշտությունը՝ այդ ժամանակ միջնորդությամբ հանդես կգանք:
Կարդացեք նաև
– Արդյո՞ք վարույթը փոխանցելու դեպքում մեղադրյալն էլ կփոխանցվի ՀՀ իրավապահներին։
– Հայկական կողմը եւս ունի վարույթ, եւ գործը քննվում է հենց այդ վարույթի շրջանակներում։ Ինչ վերաբերվում է միջնորդությանը, ենթադրվում է, որ ՌԴ իրավապահների կողմից հարուցված քրգործի վարույթը փոխանցվելու դեպքում մեղադրյալը եւս կփոխանցվի ՀՀ իրավապահներին։ Ամեն դեպքում դա երկու կողմերի համաձայնության խնդիրն է։ Դա գլխավոր դատախազների մակարդակով ձեոք բերվող համաձայնություն է։ Իրենք կորոշեն, իսկ մենք երբ պահը գա, կարիք կլինի՝ կկատարենք համապատասխան գործողություններ, որոնց իրավունքը ունենք։ ՌԴ իրավապահների վարույթի հետ մենք որեւէ առնչություն չունենք, քանի որ այն գործով, որը հարուցված է ՌԴ կողմից՝ մենք, որպես դատավարության մասնակից, ներգրավված չենք։
Հովհաննես ՄՈՒՐԱԴՅԱՆ
Հոդվածն ամբողջությամբ կարող եք կարդալ «Չորրորդ իշխանություն» թերթի այսօրվա համարում
