Այսօր «Մեդիա կենտրոնում» քննարկվեց «Ցորենի ալյուրի հարստացման մասին» ՀՀ օրենքի` մեծ դժգոհություն առաջացրած նախագիծը:
ՀՀ Առողջապահության նախարարության մոր և մանկան առողջության պահպանման վարչության պետ Կարինե Սարիբեկյանը նշեց, որ հարստացումը կատարվելու է երկաթի, ֆոլաթթվի և ցինկի ավելացմամբ: Նա նշեց, որ երկաթի պակասությունը բերում է երեխաների մոտ անեմիայի, իմունիտետի անկման և այլ ախտահարումների, ֆոլաթթվի պակասը հանգեցնում է նրան, որ նյարդային խողովակի բնածին արատներով երեխաներ են ծնվում, ցինկի անբավարարվածությունը հանգեցնում է երեխաների աճի տեմպերի դանդաղեցման և այլ բարդությունների:
Կենսաֆիզիկոս Աշոտ Կարապետյանը հակադարձեց. «Ալյուրի հարստացումը արդարացված է այն դեպքում, երբ անեմիան հասնում է 20-40 տոկոսի»:
Տիկին Սարիբեկյանը փաստարկեց, թե միայն անեմիան ցուցիչ չէ:
Կարդացեք նաև
Պարոն Կարապետյանն ի պատասխան նշեց. «Անգլիան միայն երկաթով է հարստացնում ալյուրը, Իռլանդիան հրաժարվել է ալյուրի հարստացումից, Ֆինլանդիան չի հարստացնում ալյուրը 1952-ից հետո, երբ կաթը երկաթով հարստացնելուց հետո երեխաների շրջանում մահացության դեպքեր են եղել»:
Իրազեկ և պաշտպանված սպառող հ/կ-ի նախագահ Բաբկեն Պիպոյանը մտահոգություն հայտնեց, թե անտարբերությունն այս հարցում ամենաանընդունելին է. «Բազմակարծությունը պետք է որպես թշնամություն չդիտարկել, այլ լիարժեք փաստարկել, քանի որ կան բժիշկներ ու ոչ բժիշկներ: Լավ կլինի, որ գործընթացին չմասնակցի միայն առողջապահության նախարարությունը, այլ կան պետական մարմիններ, որոնք պարտավոր են իրենց տեսանկյունը ներկայացնել և այս իներտությունը ևս կասկածի տեղիք է տալիս»:
Տաթև ՀԱՐՈՒԹՅՈՒՆՅԱՆ
