Դատական կարգադրիչների գործով ՀՀ վճռաբեկ դատարանի դատական դեպարտամենտի անձնակազմի կառավարման վարչության պետ Անգին Ղուկասյանն այսօր հայտարարեց, որ ինքը Միսակ Մարտիրոսյանին մի անգամ 1000 դոլար է տվել՝ Ռուզաննայի գործով, իսկ մի անգամ էլ 1000 դոլարից 800-ը տվել է նրան, 200-ը վերցրել իրեն, քանի որ Միսակ Մարտիրոսյանը չէր սիրում մանրը տալ, «Կարող էր դա էլ ուզել»:
Իսկ կաշառքի մեկ այլ դրվագով՝ Վիկտորիա Կարապետյանի, նա ասաց, որ Վիկտորիան մինչեւ Միսակ Մարտիրոսյանի մոտ բարձրանալը, իր աշխատասենյակ է եկել ինչ-որ կոնյակով եւ ոսկեդրամով, որը տարել է Միսակ Մարտիրոսյանին՝ ծննդյան օրվա առթիվ, դեկտեմբերի 3-ին:
Իսկ իրեն նվիրած բիժուի մասին Ա. Ղուկասյանն ասաց, որ առերեսման ժամանակ է հայտնել, չի թաքցրել: Դատավոր Արշակ Վարդանյանի հարցին, թե բիժուն ի՞նչ արեցիք, Անգին Ղուկասյանն ասաց, որ այն նվիրել է աղջկա ուսուցչուհուն:
Կարդացեք նաև
Միսակ Մարտիրոսյանին հետաքրքրում էր, թե 6-րդ վարչությունում երբ եւ որ ժամին է ցուցմունք տվել Անգին Ղուկասյանը: Պարզվեց՝ 2013թ. սեպտեմբերի 23-ին, երբ առերեսում է տեղի ունեցել Արթուր Եղիազարյանի հետ, առերեսումից հետո նրան են մոտեցել 6-րդ վարչության աշխատակիցներ, եւ համապատասխան վկայական ցույց տալուց հետո Ա. Ղուկասյանը հայտնվել է 6-րդ վարչությունում:
Ի դեպ, նրա մոտ եղել է բջջային հեռախոսը, որից, ըստ ամբաստանյալի, ինքը զանգել է տուն:
Միսակ Մարտիրոսյանի այն հարցին, թե ինչու է ազատման դիմում գրել Ա. Ղուկասյանը, նա պատասխանեց, որ ցանկացել է այլ աշխատանքի անցնել:
Մ. Մարտիրոսյանը հրապարակեց սպորտի եւ երիտասարդության հարցերի նախարարությունից ստացված պաշտոնական գրություն, համաձայն որի՝ 2013թ. ապրիլի 12-ից մինչեւ հոկտեմբերի 11-ը Ա. Ղուկասյանը եղել է տվյալ նախարարության աշխատակազմի ղեկավարի տեղակալը:
Ա. Ղուկասյանը հրաժարվեց դատարանում ցուցմունք տալ, հայտնելով, որ իր կատարած արարքին քրեաիրավական գնահատականը ճիշտ չի տրված, որ ինքը ընդամենը կաշառքի միջնորդն է եւ չի հանդիսանում կաշառքի սուբյեկտ եւ որ ինքը ընդամենը միջնորդել է նշանակողի եւ աշխատանք փնտրողի միջեւ: Նա ընդունեց, որ կաշառք եղել է:
Ակնհայտ լարվածություն ստեղծվեց Միսակ Մարտիրոսյանի եւ Ա. Ղուկասյանի միջեւ, մինչդեռ նախաքննության ժամանակ երկուսն էլ պնդել էին, թե միմյանց հետ թշնամություն չեն ունեցել:
Այս պահին Միսակ Մարտիրոսյանը եւ նրա պաշտպան Վարդան Զուռնաչյանը միջնորդեցին, որպեսզի հրապարակվեն Ա. Ղուկասյանի նախաքննության ժամանակ տված ցուցմունքները:
Ռուզան ՄԻՆԱՍՅԱՆ
