Քաղաքագետ Գագիկ Համբարյանը հայ-ադրբեջանական սահմանի լարվածության պատճառների մի քանի վարկած ունի: Այսօր «Տեսակետ» ակումբում ասուլիսի ժամանակ վարկածներից մեկը նա համարեց Մինսկի խմբի գործունեությունից ադրբեջանցիների դժգոհությունը:
«Ադրբեջանցիներին ձեռնտու չէ Մինսկի խմբի ներկայիս ձևաչափը, կազմը, նրանք պնդում են, որ ձևաչափը պետք է փոխվի, ինչպես նաեւ փոփոխություններ լինեն համանախագահների կազմում: Առաջարկում են կազմի մեջ ներգրավել գերմանացի ու թուրք ներկայացուցիչների»,- ասաց քաղաքագետը:
Եթե գերմանացի ներկայացուցչի ներգրավումը քաղաքագետի համար հասկանալի է, ապա թուրք ներկայացուցչի ներգրավումը համարում է աբսուրդ. «Թուրքիան Հայաստանի հետ դիվանագիտական հարաբերություններ չունի, վարում է բացահայտ հակահայկական քաղաքականություն եւ բացահայտ ադրբեջանամետ է»:
Սահմանին ստեղծված լարվածության երկրորդ վարկածը քաղաքագետը կապում է նավթի համաշխարհային գների անկմամբ. «Չնայած ադրբեջանական իշխանությունները հայտարարում են, որ ամեն ինչ լավ է, նավթի գների անկումը տնտեսության վրա ազդեցություն չի ունենալու, բայց բոլոր երկրների տնտեսությունները, որոնք նավթի գներից են կախված, խնդիրներ ունեն: Եվ սահմանին իրավիճակը սրելով՝ Ադրբեջանի իշխանությունը փորձում է շեղել ադրբեջանցիների ուշադրությունը երկրում ստեղծված սուր սոցիալ-տնտեսական վիճակից, որին նպաստել է նավթային գները»:
Կարդացեք նաև
Իսկ վերջին վարկածը Գագիկ Համբարյանը կապում է Ռուսաստան- Արեւմուտք հակամարտությամբ: Նա չի բացառում, որ Ռուսաստանն է հրահրում սահմանի լարվածությունը, որ Արեւմուտքի ուշադրությունը շեղի ուկրաինական խնդրից եւ նույն կերպ չի բացառում, որ Արեւմուտքն է հրահրում լարվածություն, որ Ռուսաստանի ուշադրությունը շեղի ուկրաինական խնդրից:
Ինչ վերաբերում է պատերազմի վերսկսման հավանականությանը, նա հիշեցրեց, որ վերջին տարիներին Ադրբեջանը 6-8 միլիարդ դոլարի զենք է գնել ու գուցե եկել է օգտագործելու ժամանակը. «Եթե սոցիալ տնտեսական վիճակը նավթի գների պատճառով վատանում է, Ադրբեջանի իշխանությունը պետք է ժողովրդին բացատրի, թե այդ ութ միլիարդը ուր է գնացել»:
Քաղաքագետի համոզմամբ, պատերազմի վերսկսումը կանխում են նաեւ նավթային կորպորատիվները՝ լավ հասկանալով, որ ռազմական լայնածավալ գործողությունների ժամանակ հայկական կողմը կվնասի Հայաստանի սահմանի մոտով անցնող նավթամուղերը:
Արփինե ՍԻՄՈՆՅԱՆ
