«Արտակի առողջական վիճակը շարունակում է մնալ կայուն ծանր, բայց դրական դինամիկայով»,- այսօր «Պոստ սկրիպտում» մամուլի ակումբում հայտարարեց շաբաթ օրը ծեծի ենթարկված «Կասեցում» շարժման ակտիվիստ Արտակ Խաչատրյանի եղբայրը`Արտյոմ Խաչատրյանը: Թոքերի դրենաժավորումը դեռ երկու-երեք օր կշարունակվի, Արտակը դեռ գտնվում է վերակենդանացման բաժանմունքում: Հիշեցնենք, կա թոքերի սալջարդ, ինչի հետեւանքով էլ երեկ Արտակի վիճակը կտրուկ վատացել էր:
Արտյոմ Խաչատրյանը տեղեկացրեց, որ ոստիկանության սպաները շուրջօրյա հսկողություն են իրականացնում վերակենդանացման բաժանմունքում ու շնորհակալություն հայտնեց ոստիկանությանն այդ ծառայության համար: «Շնորհակալ եմ բոլորից`հասարակ քաղաքացուց մինչեւ քաղաքական կուսակցություններ, որոնք արագ եւ ադեկվատ արձագանքել են»,- ասաց նա:
Չի արձագանքել միայն ՀՀԿ-ն: «Տպավորություն է, որ տեղյակ չեն կամ նորմալ են համարում այս վիճակը»,- տարակուսեց նա` հավելելով. «Մենք արդեն ունենք բավականին գրագետ, իրազեկված հասարակություն, կոնսոլիդացիա կա քաղաքական ուժերի մեծամասնության ու ժողովրդի մեջ, սա նշանակում է, որ մենք խոսում ենք ոչ թե կոնկրետ դեպքի ու անձի մասին, այլ երեւույթի մասին»:
Արտյոմ Խաչատրյանը վստահեցրեց, որ Արտակը քրեական աշխարհի հետ կապ չի ունեցել: Նա պնդեց, որ տեղի ունեցածը կազմակերպված հանցագործություն էր ու հորդորեց ոստիկաններին`հանցագործության հետքը որոնել Արտակի հասարակական գործունեության մեջ:
Կարդացեք նաև
Այլ մանրամասները` տեսանյութում
Նելլի ԳՐԻԳՈՐՅԱՆ
