«30 տարի անց…»՝ այսպես էր այսօր կայացած իր մենահամերգը խորագրել Կոնստանտին Սարաջյանի անվան երաժշտական դպրոցի բազմամյա դաշնակահարուհի եւ դաշնամուրի ուսուցչուհի Տամարա Պողոսովան:
«Երեսուն տարի առաջ այս բեմում կայացավ իմ առաջին մենահամերգը, երեսուն տարի առաջ ես կորցրի իմ թանկագին մայրիկին՝ Ժուանիտա Բոգդանովնային, ում նվիրված է այս համերգը: Նա դաշնամուրի իմ առաջին ուսուցիչն էր, եւ նրա շնորհիվ է նաեւ, որ ես այսօր այս բեմում եմ»,- ասաց Տ. Պողոսովան իր հանդիսատեսներին, որոնք ոչ միայն նրա բազմաթիվ ընկերներն էին, այլեւ մի քանի սերունդների աշակերտները, ովքեր Տամարա Պողոսովայի շնորհիվ հաղորդակից են դարձել երաժշտությանը, արվեստի գեղեցկությանը:
Տ. Պողոսովան, կամ պարզապես՝ Տոման, ինչպես նրան կոչում են ոչ միայն ընկերներն ու հարազատները, այլեւ անգամ՝ աշակերտները, անգնահատելի դեր ունի իր բոլոր աշակերտների կյանքում, որոնց նա ոչ միայն դաշնամուր նվագել է սովորեցնում, այլեւ՝ մտերիմ ընկեր է դառնում եւ իր օրինակով մասնակից դառնում նրանց՝ որպես մարդ ձեւավորմանը: Այդ մասին նշեցին նրա աշակերտների ծնողները, ովքեր նույնպես ներկա էին Տամարա Պողոսովայի մենահամերգին:
Բախ, Մոցարտ, Բեթհովեն, Դեբյուսի… Մեծ կոմպոզիտորների գործերը Տ. Պողոսովայի կատարմամբ յուրովի էին հնչում՝ չափից ավելի զգացմունքային, ճիշտ այնպես, ինչպիսին կատարողն է: Ծափողջույնները երկար ժամանակ չէին դադարում:
Կարդացեք նաև
Սակայն Տ. Պողոսովան չէր կարող մոռանալ ի վերուստ իրեն տրված ուսուցչի կոչման մասին, եւ վերջում հանդիսատեսին սպասվում էր հետաքրքիր անակնկալ: «Կատակում են երաժիշտները»՝ հայտարարեց դաշնակահարուհին, եւ բեմում հայտնվեցին նրա ներկայիս աշակերտները: Մոնտիի «Չարդաշը» կատարեցին բոլորը միասին՝ ռոյալի վրա երբեմն մի ձեռք էր նվագում, որոշ պահերի՝ միանգամից՝ ութ:
Համերգի ավարտից հետո էլ հիացած հանդիսատեսը երկար ժամանակ բաց չէր թողնում դաշնակահարուհուն՝ շնորհավորանքների եւ շնորհակալությունների տարափը շարունակվում էր:
Մելանյա ԲԱՐՍԵՂՅԱՆ
