«Գագիկ Ծառուկյանն առաջին անգամ չի հնչեցրել, որ պահանջում է արտահերթ նախագահական ընտրություններ: Այդ պահանջը միշտ էլ եղել է: Մենք ժամանակին տեսել ենք քաղաքականությամբ զբաղվողների, որոնք միշտ իշխանափոխության օր եւ ժամ են հայտարարել՝ այսինչ օրը, այսինչ ժամին: Մենք այդպիսին չենք, նմանություն չունենք: Մենք գործում ենք պրագմատիզմի դաշտում»,- «Առավոտի» հետ զրույցում Գագիկ Ծառուկյանի հրավիրած խորհրդաժողովն ամփոփելով՝ ասաց ԲՀԿ պատգամավոր Ստեփան Մարգարյանը:
Նա ասաց, որ ուզում են որքան հնարավոր է շուտ լինի իշխանափոխությունը. «Բայց թե երբ կլինի՝ պետք է գնալ հասարակական տրամադրություններին համահունչ: Եթե մեզ հաջողվի շատ ավելի արագ կոնսոլիդացնել՝ կգնանք շատ արագ: Այնպես որ՝ նշել օր, ասել՝ շուտ, ուշ՝ դա հարաբերական բան է: Մենք ուզում ենք չթողնել մեզ սխալվելու տեղ: Որովհետեւ սխալվելը եւ պարտվելն այս պարագայում վտանգավոր է երկրի համար»:
«Առավոտ» օրաթերթ
06.02.2015
