«Շրջանառության հարկի մասին» օրենքի փաստաթղթավորման պահանջի հետաձգումը չի նշանակում հարցի լուծում: Այսօր «Փաստարկ» մամուլի ակումբում պատասխանելով Aravot.am-ի այն հարցին, թե «Շրջանառության հարկի մասին» օրենքում պարտադիր փաստաթղթավորման պահանջը կասեցվել է արդեն երկու անգամ, արդյո՞ք դա խելամիտ որոշում է, այսպես պատասխանեց տնտեսագետ Վարդան Բոստանջյանը: Նշենք, որ «Շրջանառության հարկի մասին» ՀՀ օրենքով սահմանված ապրանքների ձեռքբերման, փաստաթղթավորման պահանջի գործողությունը կասեցվել է մինչև հուլիսի 1-ը: Նախորդ անգամ կասեցվել էր մինչեւ փետրվարի 1-ը:
«Սպասեք, տեսնենք ինչ կլնի»՝ այս մոտեցումը, ըստ պրն Բոստանջյանի, ամենացածր մակարդակներում է ի հայտ գալիս. «Սակայն պետության մակարդակով ինչպե՞ս կարելի է: Հետաձգում ենք մինչեւ փետրվարի մեկը, փետրվարի մեկին ժողովուրդը չի մոռացել դրա մասին, դե լավ հիմա էլ հետաձգենք մինչեւ հուլիսի մեկը: Այսինքն մենք սպասում ենք, որ ձայն չհանե՞ն, սպասում ենք, որ հանրապետությունը դատարկվի՞»: Վարդան Բոստանջյանը այն համոզմունքն ունի, որ պետք է արմատական փոփոխություններ մտցնել:
Մանրամասն՝ տեսանյութում
Վարդան Բոստանջյանի խոսքով՝ ամբողջ աշխարհում համախառն ներքին արդյունքի ստեղծման շեշտը դրվում է փոքր եւ միջին ձեռնարկատիրության վրա. «Իսկ Հայաստանի հանրապետությունում այս առումով ունենք ընդգծված խոցելիություն: Հայաստանում տեսնում ենք, որ մոնոպոլիզացիայի մեծ աստիճանի պարագայում շրջանառությունը հիմնականում իրականցվում է փոքր թվով տնտեսվարող սուբյեկտների կողմից եւ այս պարագայում ՓՄՁ-ներին գործունեության տիրույթ չի մնում: Այսինքն զբաղվածությունը, համապատասխան եկամուտը բացակայում է եւ որն էլ հանգեցնում է աղքատության եւ արտագաղթի բարձր մակարդակի»:
Կարդացեք նաև
Տնտեսագետը վստահ է, որ օրենքի հետեւանքները ունեն քաղաքական, տնտեսական եւ սոցիալական կողմեր. «Քաղաքացին, ի զորու չլինելով իր գոյության էլեմենտար պայմանները ապահովելու, փաստորեն դուրս է գալիս փողոց: Սա քաղաքական կողմն է: Տնտեսական կողմն այն է, որ եթե երկիրը չունենա փոքր եւ միջին բիզնես, ապա դա կտանի տնտեսական համակարգի կործանման»:
Մանրամասն՝ տեսանյութում
Էլյա ՀՈՎՀԱՆՆԻՍՅԱՆ
