Թռուցիկ հետեւել եմ խորհրդաժողովի ընթացքին, նաեւ կարդացել եմ Ծառուկյանի ելույթը»,- այսօր ԱԺ ճեպազրույցի ժամանակ խոսելով երեկվա ոչ իշխանականների խորհրդաժողովի մասին՝ ասաց ՀԱԿ խմբակցության ղեկավար Լեւոն Զուրաբյանը:
Նա հայտարարեց. «Մեզ համար ԲՀԿ-ն շատ վստահելի գործընկեր է, որի հետ համագործակցում ենք: Կոնկրետ Ծառուկյանի ելույթի մասին կարող եմ ասել, որ սա իսկապես առաջընթաց է: Առաջին անգամ ԲՀԿ-ն, Գագիկ Ծառուկյանը հրապարակայնորեն հարց դրեցին ՀՀ-ում արտահերթ նախագահական ընտրությունների անցկացման վերաբերյալ: ՀԱԿ-ԲՀԿ դաշինքը բավականին արդյունավետ դաշինք է: Հիմա խոսում եմ երկկողմ հարաբերությունների մասին, ոչ եռյակ: Կան բնականաբար տարբեր մոտեցումներ մարտավարության հարցում: ՀԱԿ-ը կողմնակից է ավելի արմատական լուծումների: Մենք վստահ ենք, որ ամենաճիշտ քայլը ստեղծված իրավիճակում կլինի ժողովրդի կողմից ընդվզումը՝ ՀՀ-ում արտահերթ նախագահական եւ խորհրդարանական ընտրությունների անցկացման նպատակով: Մենք պետք է պարտադրենք այս իշխանություններին, որ նրանք անմիջապես հեռանան»:
Լեւոն Զուրաբյանի խոսքերով՝ ԲՀԿ-ի եւ ՀԱԿ-ի դիրքորոշումները աստիճանաբար մերձենում են. «Տեսնում եք, որ մարտավարական տարբերությունները գնալով հարթվում են եւ այդ տարբերությունն ավելի ու ավելի նեղ է դառնում: Գագիկ Ծառուկյանի դիրքորոշումը եւս մեկ քայլ էր՝ այդ տարբերությունը հարթելու ուղղությամբ: Նրանք էլ են գնում զիջումների, մենք էլ ենք գնում զիջումների: Կարեւորը՝ նրանք հասկանում են, որ կարեւորը ոչ թե առանձին ուժի դիրքորոշումն է, այլ այն, որ մեր ջանքերը կարողանում ենք համատեղել: Մենք մշտապես գնում ենք փոխզիջումներ գտնելու ուղղությամբ եւ գտնում ենք: Առաջիկա եռակողմ հանդիպման ընթացքում, վստահ եմ, կգտնվեն այնպիսի լուծումներ, որ կկազմակերպվեն հանրահավաքների հզոր ալիք, որը կտանի իշխանափոխության»:
Հռիփսիմե ՋԵԲԵՋՅԱՆ
