«Արևմտահայոց ազգային համագումար» կազմակերպության ազգային խորհրդի անդամ, ազգագրագետ Հարություն Մարությանի կարծիքով, ցեղասպանվածի, զոհի բարդույթը Հայաստանում հաղթահարվեց 80-ականներին:
«Հաղթահարվեց ղարաբաղյան շարժման տարիներին եւ հաղթահարումը ամրապնդվեց արցախյան հաղթանակներով: Տասնամյակներ շարունակ ապրիլի մասին խոսելով՝ շեշտադրում ենք ցեղասպանության զոհերի հիշատակման օրը, լսողների մոտ ձեւավորվում է զոհի կարծրատիպը ու ընկալվում է որպես կորուստների հիշատակի օր: Ցանկանում եմ շեշտադրել, որ ցեղասպանության տարիներին հայերը շատ տեղերում կռվել ու դիմադրել են:
Ինքնապաշտպանական կռիվներ եղան Վանում, Մուշում, Ուրֆայում, Հաճնում, Այնթափում, Սասունում, Վասպուրականում եւ այլ տեղերում»,- այսօր «Պոստ սկրիպտում» ակումբում ասաց ազգագրագետը:
Նրա խոսքով, հայերը չեն ապստամբել, չեն մորթվել ոչխարի պես, պայքարել են:
Կարդացեք նաև
Պարոն Մարությանը պատմեց, որ հաջորդ ամիս Ամերիկա է մեկնելու՝ ցեղասպանության թեմայով գիտաժողովի մասնակցելու, զեկուցելու է «հայերի փրկության մասին», բայց գիտական հարթության վրա. «Անընդհատ խոսվում է, այն մասին, թե ինչու չեք խոսում, որ թուրքերը նաեւ փրկել են հայերին: Բայց, եթե փրկել են, ապա փրկել են տնտեսական, սեռական ու այլ բնույթի շահագործման դեպքերում, որոնք նույնպես ցեղասպանական բնույթի գործողություններ են: Երբ հանում ենք ցեղասպանական բնույթի գործողություները, քիչ բան է տակը մնում, ուզում եմ այդ հարցը դիտարկել ավելի լայն մասշտաբով»:
Նա ասաց, որ Միջազգային գիտաժողով է առաջիկայում կազմակերպվելու նաեւ Հայաստանում նվիրված Վանի հերոսամարտի հարյուրամյակին եւ Վան քաղաքի ստեղծման հիշատակմանը:
Արփինե ՍԻՄՈՆՅԱՆ
