«Շահութահարկի մասին» օրենքում լրացումներ և փոփոխություններ կատարելու մասին օրենքի նախագծի մասին ոչ իշխանական ուժերի ներկայացուցիչների ելույթներում ՀՀԿ խմբակցության ղեկավար Վահրամ Բաղդասարյանը միայն քաղաքական շահարկումներ է տեսնում:
«Պարոն Լեոն (դիմեց ՀԱԿ պատգամավոր Լեւոն Զուրաբյանին) այս պահին քաղաքական շահարկումներով էիք զբաղված: Դուք զբաղված եք քաղաքական շահարկումներով, իսկ նրանք, որոնք նախագծում լավ նպատակն են տեսնում, մտածում են ապագայի սերունդների մասին:
Քաղաքական շահարկումների խնդիր չունենք, այս օրենքը, որը տնտեսական քաղաքականության տարր ունի, ունի լավ նպատակներ, ցանկանում ենք, որ վերջնական տեսքով դառնա այնպիսին, որով չվնասենք»,- անդրադառնալով ելույթներին եզրափակեց Վահրամ Բաղդասարյանը:
Ըստ նրա, չպետք է անընդհատ վախենան որեւէ գործողություններ կատարելուց եւ միայն մտածեն, թե ինչպես բյուջեն լցնեն: «Բյուջեի մուտքերի ավելացումը չի նշանակում տնտեսական զարգացում: Այստեղ խոսվեցին` բյուջեի հաշվին նման գործողություններ ենք անում, որ խթանենք արտահանումը: Իմ հաշվարկներով այս օրենքը, երբ փոփոխություններից հետո դառնա այնպիսին, որ չվնասի մնացած արտահանողներին…»,- Վահրամ Բաղդասարյանի այս հայտարարությունը դահլիճից հնչող ռեպլիկների արժանացավ, նա ընդհատեց ու դիմեց ԱԺ փոխնախագահ Հերմինե Նաղդալյանին կարգի հրավիրել ու դուրս հանել:
Կարդացեք նաև
Դիտողությունից հետո շարունակեց. «Մեկ-երկու տարի հետո շահութահարկի տոկոսադրույքն իջեցնելով` կկարողանանք ավելի շատ մուտքեր ունենաք բյուջե, քան հիմա: Ո՞րն է պետության շահը, այդպիսի հարցադրում եղավ: Չեմ կարծում, որ միակ շահը բյուջեն լցնելն է: Պետության շահն է `օրենքի ճիշտ ներմուծման դեպքում խթանել արտահանումը, խրախուսել ներդրումը»: Նա օրենքի ընդունման հետաձգման անհրաժեշտություն չի տեսնում, ասաց բավականին ժամանակ ունեն բազմակողմանի քննարկելու:
Հիշեցնենք, որ նախագծով առնվազն 50 միլիարդ դրամի չափով արտահանում իրականացնող կազմակերպությունները «Շահութահարկի մասին» օրենքում առաջարկվող փոփոխությունների համաձայն՝ հաշվետու տարում 20 տոկոսի փոխարեն կվճարեն 2 տոկոս շահութահարկ, սակայն Հայաստանի Հանրապետության տարածքում եկամուտ ստանալու իրավունք չեն ունենա:
ՀՀԿ-ական պատգամավոր Գարեգին Նուշիկյանն էլ դրական արտահայտվեց օրենքի մասին, ասաց` օրենքը շատ կարեւոր է, եւ պետք է ուշադիր լինենք ու միասնական ուժերով համաձայնեցնենք կառավարության հետ ու այս լավ գաղափարը դարձնենք մեր արտահանման խթանման համար լավ օրենք:
Արփինե ՍԻՄՈՆՅԱՆ
