Մոսկվայից Հայաստան եկող ուղեւորին, որը ՀՀ քաղաքացի է, հրաժարվել են Մոսկվայի օդանավակայանի անմաքս առեւտրի խանութում` «Դյութի ֆրի»-ում, ապրանք վաճառել` պատճառաբանելով, որ գտնվում են ԵՏՄ միասնական տարածքում, այսինքն` միասնական մաքսային գոտում, հետեւաբար չեն կարող օգտվել «Դյութի ֆրիի» համար նախատեսված մաքսային արտոնությունից:
Նույն խնդիրն ունեցել են այդ նույն չվերթով մեր երկիր եկող մեր մյուս քաղաքացիները, որոնցից շատերը ստիպված են եղել ձեռնունայն վերադառնալ, քանի որ հույս են ունեցել, որ առեւտուրը կանեն «Դյութի ֆրի»-ից:
Այս խնդիրը ծագել է Եվրասիական տնտեսական միության անդամ դառնալուց հետո: Միությանն անդամակցելով` Բելառուսի, Ղազախստանի եւ Ռուսաստանի քաղաքացիները ԵՏՄ ուղղությամբ մեկնելիս, նույնպես, չեն կարող օգտվել անմաքս խանութի ծառայությունից:
Aravot.am-ի այն հարցին, թե Հայաստանից ԵՏՄ ուղղությամբ մեկող մեր քաղաքացիները նույնպե՞ս չեն կարող մեր օդանավակայանի «Դյութի ֆրի»-ից գնումներ կատարել, «Էյ Դի Էֆ Շոփս» ընկերության տնօրինությունից պատասխանեցին, որ ԵՏՄ երկրներից միայն Հայաստանի համար է բացառություն արվել: Ըստ ընկերության պատասխանատուների, ԵՏՄ պայմանագրի 3-րդ հավելվածի 27-րդ կետով ամրագրված է, որ ՀՀ-ում գտնվող անմաքս առեւտրի խանութները իրավունք ունեն շարունակելու վաճառելու, այդ թվում ԵՏՄ ուղղություններով. «Մենք էլ, որպես օպերատոր, պարտավոր ենք ներմուծված` ոչ ԵՏՄ արտադրության ապրանքները, ԵՏՄ ուղղությամբ վաճառելու պարագայում կիրառել սահմանափակումներ: Վաճառում ենք եւ վճարում ենք դրա հասանելիք մաքսատուրքը»:
Կարդացեք նաև
Նշենք, սակայն, որ մեր օդանավակայանից, ԵՏՄ ուղղությամբ մեկնող ԵՏՄ անդամ երկրների քաղաքացիները չեն կարող անսահմանափակ քանակությամբ ապրանք գնել. Սահմանափակումներ կան հատկապես ալկոհոլային խմիչքների, ծխախոտի եւ մի քանի այլ` ենթաակցիզային ապրանքների վրա: Օրինակ` չեն կարող ալկոհոլ գնել 3 լիտրից ավելի եւ այլն:
Լուսինե ԲՈՒԴԱՂՅԱՆ
